MAGATE Bas direktorı Rafael Grossi wákillik múddeti dawamında birinshi márte Agentlik Basqarıw keńesin jıynadı.
– Bul Irandaǵı awır jaǵdaydan dárek beredi, – dedi RFnıń usı xalıqaralıq shólkemdegi turaqlı wákiliniń orınbasarı Roman Ustinov “RIA Novosti” xabarshısına.

Májiliste AQShtıń Iran yadro obektlerine soqqısı teması dodalanǵan.
– Bul gezeksiz sessiya keńeske aǵza birde-bir mámleket emes, al basshınıń baslaması menen shaqırıldı, – delingen xabarda. – Ol tap usınday wákillikke iye, biraq birinshi márte bunday jıyın shólkemlestirilgeni jaǵdaydıń qanshelli awır ekenin kórsetpekte. Bas direktor Izrail hám AQSh Irannıń yadrolıq obektlerine tikkeley soqqı bergennen keyingi jaǵday pútkil yadrolıq qural tarqatpaw sisteması ushın oǵada awır aqıbetke alıp keliwi hám sol sebepli ayırım qádemler taslaw zárúrligin atap ótti.
– Tábiyǵıy, biz bul pikirdi qollap-quwatladıq, – dep jaǵdayǵa anıqlıq kirgizgen rossiyalı diplomat.
22-iyunǵa ótetuǵın túnde AQSh Irannıń Natanz, Fordo hám Isfaxandaǵı úsh yadro obektine soqqı berdi. Vashington hújim yadro baǵdarlamasın joq etiw yamasa keskin ázziletiw maqsetinde shólkemlestirilgenin atap ótti. Óz gezeginde Iran Atom energiyası shólkemi Islam Respublikası yadro sanaatı rawajlanıwdan toqtamaytuǵının bildirdi.
Sol waqitta AQShtıń hújimi xalıqaralıq kólemde unamsız nátiyje berdi. Máselen, Birlesken Milletler Shólkeminiń Bas xatkeri Antoniu Guterrish endi regionda qáwip kúsheyip, xalıqaralıq tınıshlıq hám qáwipsizlikke tikkeley qáwip kúsheyetuǵının boljamaqta. Rossiya da AQShtıń Irandaǵı yadro obektlerine soqqı bergenin keskin qaraladı.
– Olar xalıqaralıq huqıq, BMSh Rejesi hám Qáwipsizlik Keńesi rezolyuciyaların qopal túrde buzbaqta, – delingen RF bildiriwinde. – Moskva MAGATEden waqıyalarǵa qalıs múnásibet kútedi.

S.Rahimov, ÓzA