Házirgi waqıtta densawlıqtı saqlaw hám strategiyalıq rawajlanıw institutı Qaraqalpaqstan Respublikası aymaqlıq bólimi tárepinen Ózbekstan Respublikası Prezidentiniń 2025-jıl 19-maydaǵı “Respublikada Densawlıqtı saqlaw sistemasın hám xalıqqa medicinalıq xızmet kórsetiw principlerin jetilistiriw arqalı tarawdı reformalawdı basqıshpa-basqısh dawam ettiriw ilajları haqqında”ǵı pármanı, “Densawlıqtı saqlaw sistemasında reformalardı ámelge asırıwdıń qosımsha ilajları haqqında”ǵı qararı talaplarınıń orınlanıwın támiyinlew maqsetinde “Salamat turmıs tárizin qáliplestiriw” atamasında oqıw-seminarları ótkerilmekte.

Gezektegi seminar Ellikqala rayonında Ámiwdárya, Beruniy, Ellikqala, Tórtkúl rayonlıq medicina birlespeleriniń juwapker medicina xızmetkerleri ushın shólkemlestirildi.
Seminarda xalıq arasında I hám II qáwip toparına tiyisli salamat turmıs tárizi hám kesellikler profilaktikası boyınsha túsindiriw jumısları alıp barıldı. Medicina xızmetkerleriniń áhmiyet qaratıwı kerek bolǵan máseleler dodalandı.
Sonday-aq, dene salmaǵı indeksin esaplaw, qantlı diabettiń 2-túri hám júrek-qan tamır kesellikleri qáwipin anıqlaw boyınsha telegram-botlar hám mobil qosımshalar, sonday-aq, “Salamat bolayıq” platforması, jasalma intellekt járdemshisi menen islesiw usılları túsindirildi.
Ilaj qatnasıwshıları qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi