Insan qádiri eń joqarı qádiriyat esaplanǵan mámleketimizde barlıq tarawlar sıyaqlı, sud-huqıq sistemasında da bir qatar reformalar ámelge asırılıp, sońǵı 8 jıldıń ózinde sudlarǵa baylanıslı 70 ke shamalas nızam, párman hám qararlar qabıllandı. Olardıń materiallıq-texnikalıq bazası jaqsılandı.

Álbette, tarawda jaratılǵan usınday keń sharayat hám imkaniyatlar xalqımızdıń máselelerin durıs sheship, ádillikti ornatıwda áhmiyetli xızmet etip kelmekte. Maǵlıwmatlarǵa qaraǵanda, ótken jıldıń ózinde elimizdegi sudlarda 3 millionnan aslam másele kórip shıǵılǵan. Bul bolsa, sońǵı jılları xalqımızdıń huqıqıy sanasınıń ósip baratırǵanlıǵınıń ayqın dáliyli bolıp esaplanadı.
2024-jıldıń 1-noyabr sánesinen baslap bolsa, sudlardıń ishki hújjetler aylanısı tolıq elektron formaǵa ótkerilip, nátiyjede mámleket byudjetinen ajıratılatuǵın kóp muǵdardaǵı qarjılar únemlendi.
Sud uyımında júrgizilip atırǵan usınday úlken kólemdegi ózgerislerdi keń jámiyetshilikke járiyalaw hám durıs úgit-násiyatlawda ǵalaba xabar quralları xızmetkerleriniń atqarıp atırǵan xızmetleri ayrıqsha.
Qaraqalpaqstan Respublikası Sudında 27-iyun-Baspasóz hám ǵalaba xabar quralları xızmetkerleri kúni múnásibeti menen bayram ilajı ótkerildi.
Ilajda Qaraqalpaqstan Respublikası sudınıń baslıǵı Kamal Tariyxov, Qaraqalpaqstan Respublikası Hákimshilik sudınıń baslıǵı Ámir Nurlipesovlar baspasóz hám ǵalaba xabar quralları xızmetkerlerin kásiplik bayramı qutlıqlap, olardıń mashaqatlı hám iygilikli dóretiwshilik islerine tabıslar tiledi hám Prezidentimizdiń basshılıǵında Sud uyımınıń ashıq-aydınlıǵın támiyinlew jolındaǵı islenip atırǵan jańalanıwlarǵa ózleriniń unamlı pikirlerin bildirdi.
Ótkerilgen ilajda elimizde sud-huqıq tarawında erisilip atırǵan ámeliy nátiyjelerdi, sonıń ishinde, ádil sudlaw, insannıń huqıq hám nızamlı máplerin isenimli qorǵaw baǵdarında respublikamızdaǵı sudlar tárepinen ámelge asırılıp atırǵan jumıslardı keń jámiyetshilikke qalıs jetkeriwdegi belsendi xızmetleri ushın bir topar taraw pidayıları Qaraqalpaqstan Respublikası sudınıń Minnetdarshılıq xatı hám estelik sawǵaları menen sıylıqladı.
Óz gezeginde ilaj qatnasıwshıları da ózlerine kórsetilip atırǵan bunday joqarı húrmet hám itibar ushın, shólkemlestiriwshilerge tereń minnetdarshılıq bildirdi.

Adilbay Orazov,
Qaraqalpaqstan xabar agentligi sholıwshısı.