Qaraqalpaqstan Respublikası Avtomobil jolları bas basqarmasında 2025-jıldıń birinshi yarım jıllıǵında orınlanǵan jumıslar boyınsha baspasóz konferenciyası hám 27-iyun – Baspasóz hám ǵalaba xabar quralları xızmetkerleri kúni múnásibeti menen bayram ilajı bolıp ótti.

Ilajda basqarma baslıqları, taraw qánigeleri hám ǵalaba xabar qurallarınıń wákilleri qatnastı. Ánjumanda bas basqarma baslıǵı Umrbek Matnazarov shıǵıp sóylep, 2025-jıldıń birinshi yarım jıllıǵında ámelge asırılǵan jumıslar, atap aytqanda qurılıs-ońlaw jumısları, Baslamalı byudjet sheńberindegi joybarlar hám jol háreketi qáwipsizligi boyınsha kórilgen ilajlar haqqında tolıq maǵlıwmat berdi. Sonday-aq, sáne múnásibeti menen ilajda qatnasqan ǵalaba xabar quralları wákillerin bayram menen qutlıqlap, olardıń jumıslarında tabıslar tiledi.
Bunnan keyin soraw-juwaplar bolıp ótip, onda jurnalistler ózleriniń qızıqtırǵan sorawlarına juwapkerlerden tiyisli juwaplar aldı.
-Mámleketimizde alıp barılıp atırǵan keń kólemli reformalar qatarında jol qurılısı tarawında da unamlı ózerisler bolmaqta. Xalıqaralıq jollardan baslap, eń shetki aymaqlarǵa alıp barıwshı jollar, sonday-aq, máhállelerdegi kóshelerde de jańalanıwlar ámelge asırılıp, jollar qurılıp, qayta ońlanbaqta. Bul júz berip atırǵan unamlı ózgerislerdiń barlıǵın jarıtıp, xalıqqa jetkerip barıwda ǵalaba xabar quralları wákilleriniń ornı, xızmetleri ayrıqsha. Búgingi ánjumanda tarawdaǵı ózgerisler, orınlanǵan wazıypalar, mashqalalar hám ámelge asırılıwı lazım bolǵan jumıslar haqqında sóz etildi. Aldaǵı waqıtlarda da taraw wákilleri menen birgelikte islesip, jumıs nátiyjeliligin kórsetip barıwǵa háreket etemiz,-deydi Qaraqalpaqstan Respublikası Avtomobil jolları bas basqarması baspasóz xatkeri Dilshodbek Jumamuratov.
Ilaj dawamında 27-iyun Baspasóz hám ǵalaba xabar qural wákilleri bayramı múnásibeti menen taraw wákillerine bayram sawǵaları menen diplomlar tapsırılıp, olardıń jumıslarında tabıslar tiledi.

Qaraqalpaqstan xabar agentligi