Sońǵı jılları respublikamızda xalıq xojalıǵınıń barlıq tarawları sıyaqlı, transport tarawında da kóplegen iri ózeris hám jańalanıwlar júz bermekte. Atap aytqanda, xalqımızdıń múshkilin jeńilletiw maqsetinde, qala hám awıllarımızǵa zamanagóy jámiyetlik avtotransportlar alıp kelinip, aymaq turǵınlarına sapalı xızmet kórsetpekte. Temir jol hám puqaralıq aviaciya salasında da jańa jónelisler ashılıp, xalıq ushın keń imkaniyatlar jaratılmaqta.

Tarawda júrgizilip atırǵan usınday ózgeris hám jańalanıwlardı keń jámiyetshilikke tanıstırıwda ǵalaba xabar quralları xızmetkerleriniń islep atırǵan miyneti ayrıqsha bolıp tabıladı.
Qaraqalpaqstan Respublikası Transport ministrliginde 27-iyun-Baspasóz hám ǵalaba xabar quralları xızmetkerleri kúni múnásibeti menen bayram ilajı ótkerildi.
Ilajda Qaraqalpaqstan Respublikası Transport ministri Paraxat Qayıpov baspasóz hám ǵalaba xabar quralları xızmetkerlerin kásiplik bayramı qutlıqlap, olardıń mashaqatlı hám iygilikli dóretiwshilik islerine tabıslar tilep, bir topar taraw pidayıların ministrliktiń Húrmet jarlıǵı hám estelik sawǵaları menen sıylıqladı.
Óz gezeginde jurnalist hám blogerlerler de ózlerine kórsetilip atırǵan bunday joqarı itibar hám húrmet ushın ilaj shólkemlestiriwshilerine raxmetler aytıp, aldaǵı waqıtları da transport tarawında júz berip atırǵan jańalanıwlardı ǵalaba xabar qurallarında qalıs hám operativ járiyalawda ayanbastan xızmet etetuǵınlıǵın atap ótti.
-Sonı ayrıqsha aytıp ótiwimiz kerek, Qaraqalpaqstan telekanalı xızmetkerleri transport tarawında júz berip atırǵan jańalanıw hám ózgerislerdi jiyi járiyalap kelmekte,-deydi telekanal jurnalisti Hamiyda Sultamuratova.-Bul materiallar arasında tek maqtaw sózler menen emes, al, aymaqlarda orın alıp atırǵan mashqalalar da sın kózqarastan jámiyetshilikke jetkerilmekte. «Sın dúzelmey, min dúzelmeydi» degenindey taraw basshıları hám juwapker xızmetkerleri jurnalistlerdiń sáwlelendirgen sın kórsetiwlerine ózleriniń tez múnásibetin bildirip, orın alıp atırǵan kemshiliklerdi saplastırıwǵa háreket etpekte. Mine búgin 27-iyun-Baspasóz hám ǵalaba xabar quralları xızmetkerleri kúni múnásibeti menen bir topar jurnalist-blogerler sıyaqlı, meni de ushırasıwǵa mirát etip, bayramda xoshametlep atır. Bunıń ushın ministrlik basshılarına ózimniń tereń minnetdarshılıǵımdı bildiremen. Aldaǵı waqıtları ministrlik penen usınday óz-ara birge islesiw dawam etedi dep oylayman.

Adilbay Orazov,
Qaraqalpaqstan xabar agentligi sholıwshısı.