Beruniy rayonında jasaytuǵın jas hám qábiletli isbilermen Nodirbek Atabaev búgingi kúnde óziniń miyneti, kúsh-ǵayratı hám intakerligi menen zamanlaslarına órnek bolıp kelmekte.

Qıtay mámleketinde bilim alǵan hám ol jerde zamanagóy isbilermenlik tiykarların tereń ózlestirgen Nodirbek házirgi waqıtta óz eliniń rawajlanıwına múnásip úles qospaqta. Dáslep quyash panellerin ornatıw arqalı ekologiyalıq taza energiya dáreklerin úgit-násiyatlaǵan bolsa, búgingi kúnde jumıs kólemin jáne de keńeytken.
Jas isbilermen tárepinen qala orayında shólkemlestirilgen xızmet kórsetiw orayı qısqa waqıt ishinde xalıqtıń itibarına iye boldı. Zamanagóy talaplar tiykarında úskenelengen, ıqsham hám kórkem bul orın tek ǵana qolaylı xızmet kórsetiw emes, al jańa jumıs orınlarınıń jaratılıwına da xızmet etpekte.
Búgingi kúnde bul jerde 5 jas turaqlı jumıs penen támiyinlengen. Olar qarıydarlarǵa joqarı sapalı xızmet kórsetiwdi maqset etken.
Qıyat máhállesi belsendileri, nuraniylar bul jańadan ashılǵan orınǵa barıp, jas isbilermenniń is-háreketlerin joqarı bahaladı. Olar Nodirbek Atabaevtıń jumısına pátiya berip, jaslarǵa úlgi bolatuǵın baslama sıpatında tán aldı.
Búgingi kúnde bunday intaker, bilimli hám umtılıwshań jaslarǵa berilip atırǵan itibar nátiyjesinde máhállelerde isbilermenlik ortalıǵı qáliplespekte, xalıqtıń bántligi támiyinlenbekte hám ekonomikalıq belsendilik artıp barmaqta. Nodirbek Atabaev sıyaqlı jaslar bolsa bul jolda jetekshi sıpatında kózge taslanbaqta.

Qaraqalpaqstan xabar agentligi