Máhállelerdegi mashqalalardı úyreniw, olardıń sheshimin tabıw maqsetinde tiyisli ministrlikler menen shólkemlerdiń basshıları, deputatlar tárepinen orınlarda ushırasıwlar ótkerilmekte.

Oliy Majlis Nızamshılıq palatasınıń deputatı Ruslan Djumamuratov Nókis qalasındaǵı Jas awlad mákan puqaralar jıyınında bolıp, máhálle “jetiligi” menen ushırastı.
Ilaj dawamında deputat tárepinen elimizde nızamshılıq tarawında júz berip atırǵan ózgerisler hám jańalıqlar, qabıl etilip atırǵan párman, nızam hám qararlardıń mazmun-mánisi haqqında maǵlıwmatlar berildi.
Ushırasıwda “Kámbaǵallıqtan abadanlıqqa qaray” baǵdarlamasın ámelge asırıw boyınsha máhálle “jetiligi” tárepinen ámelge asırılıp atırǵan jumıslar, pikir-usınıslar tıńlandı.
Aymaqta puqaralar tárepinen qıytaq jerlerinen utımlı paydalanıwı hám kóp qabatlı turaq jaylar aldındaǵı tereklerdi suwǵarıwı ushın aqaba suw menen támiyinlew boyınsha múrájat bildirildi.
Sonday-aq, bankler tárepinen ajıratılıp atırǵan barlıq kredit túrleri boyınsha tiyisli qánigelerdiń qatnasıwında seminar shólkemlestiriw usınısı da berildi.
Deputat tárepinen bul máseleler tiyisli tártipte qadaǵalawǵa alındı.

Qaraqalpaqstan xabar agentligi