Samarqandta ótkerilip atırǵan BMShtıń Mámleketlik xızmet forumı sheńberinde panel sessiyaları bolıp ótti. Jasalma intellekt dáwirinde mámleketlik xızmetlerdi reformalaw máseleleri keń túrde dodalandı.

Ilaj qatnasıwshıları sanlı transformaciya processlerin jedellestiriw, puqaralarǵa jáne de jedel hám ashıq-aydın xızmet kórsetiw, sonday-aq, jasalma intellekt imkaniyatların mámleketlik basqarıwda nátiyjeli qollanıw boyınsha óz tájiriybeleri menen ortaqlastı.

Bul sessiyada sońǵı jılları mámleketlik xızmetlerdi kórsetiw procesinde jasalma intellekt texnologiyalarınıń ornı hám potencialı tiykarǵı itibar orayında boldı.
Atap ótilgenindey, jasalma intellekt mámleketlik basqarıw mexanizmlerin túp-tiykarınan ózgertiw, sonıń ishinde, ápiwayı hám tákirarlanatuǵın wazıypalardı avtomatlastırıw, sonday-aq, dálillerge tiykarlanǵan qararlar qabıl etiw ushın úlken kólemdegi maǵlıwmatlardı jıynaw, tallaw hám olardan paydalanıwdı jetilistiriwde keń imkaniyatlardı usınadı. Bunnan tısqarı, jasalma intellekt mámleketlik xızmetkerler hám puqaralar arasındaǵı qarım-qatnastı kúsheytiw, xızmetlerdiń sapasın arttırıw jáne olardı xalıqtıń individual, ásirese, sociallıq jaqtan ázzi qatlamlarına beyimlestiriwde áhmiyetli qural bolıp xızmet etedi.

Qatnasıwshılar jasalma intellekttiń qáwipsiz hám ádil qollanılıwın támiyinlew ushın algoritmlik bir táreplemelik, maǵlıwmatlardıń qáwipsizligi, insan huqıqlarına húrmet, esap beriw hám ashıq-aydınlıq sıyaqlı áhmiyetli principlerdi alǵa qoyıw zárúr ekenligin atap ótti. Atap aytqanda, mámleketlik qararlardan tásirlengen puqaralardıń múrájat etiw huqıqı, túsindiriw hám tartısıw mexanizmleri jolǵa qoyılıwı zárúr ekenligi atap ótildi.
Sonday-aq, sessiya dawamında UNU-EGOV baslaması iske qosılǵanı da járiyalandı. Onda sanlı texnologiyalar ministri Sherzod Shermatov qatnasıp, shıǵıp sóyledi.

Ministr óz sózinde BMSh universiteti – UNU-EGOV penen strategiyalıq birge islesiwdiń jolǵa qoyılıp atırǵanı elektron basqarıw tarawında zamanagóy ilimiy-izertlewlerdi alıp barıw, ámeliy birgeliktegi joybarlar, sonday-aq, qánigelerimizdiń potencialın arttırıw hám olardı tayarlaw boyınsha jańa imkaniyatlardı ashatuǵının atap ótti.

Nigora RAHMONOVA, ÓzA xabarshısı