Taw-kán sanaatı hám geologiya ministrliginde Qazaqstan Respublikası Qurılıs hám sanaat ministriniń orınbasarı Iran Sharxan basshılıǵındaǵı rásmiy delegaciya menen ushırasıw bolıp ótti.

Onda tárepler geologiya hám kánshilik tarawlarındaǵı óz-ara birge islesiwdi bunnan bılay da rawajlandırıw, ilimiy-izertlew baǵdarlarında tájiriybe almasıw hám perspektivalı birgeliktegi joybarlar haqqında sóz etti.

Qazaqstan delegaciyası aǵzaları Tashkent qalasında ótkerilip atırǵan “Minex Central Asia 2025” forumı joqarı dárejede shólkemlestirilgenin ayrıqsha atap ótip, bul ilaj Ózbekstanda geologiya hám kánshilik tarawına qaratılıp atırǵan itibar hám ámelge asırılıp atırǵan keń kólemli reformalardıń ayqın kórinisi ekenin atap ótti.

Óz gezeginde, qabıllawshı tárep keyingi jıllarda Ózbekstan hám Qazaqstan arasındaǵı doslıq qatnasıqları turaqlı rawajlanıp atırǵanın, sonıń ishinde, geologiya hám kánshilik baǵdarındaǵı birge islesiw potencialın tolıq júzege shıǵarıw úlken áhmiyetke iye ekenin atap ótti. Sonday-aq, onda birgeliktegi izertlewler, zamanagóy texnologiyalardı engiziw, tájiriybe arttırıw baǵdarlamaları hám joybarlardı ámelge asırıw boyınsha anıq usınıslar alǵa qoyıldı.

Sapar sheńberinde qazaqstanlı miymanlar Geologiya ilimleri universitetiniń jumısı menen jaqınnan tanıstı. Onda universitettiń ilimiy laboratoriyaları, bilimlendiriw processleri hám xalıqaralıq birge islesiw baǵdarlarına úlken qızıǵıwshılıq bildirildi.

Sonday-aq, delegaciya “Geologiya muzeyi” mámleketlik mákemesinde bolıp, ol jerdegi bay minerologiyalıq kollekciyalar, ilimiy ekspoziciyalar hám tarawdıń tariyxıy rawajlanıwın sáwlelendiriwshi kórgizbelerden úlken tásirler aldı.

Ministrlik málimleme xızmetiniń xabarına bola, ushırasıw juwmaǵında tárepler geologiya hám kánshilik tarawındaǵı birge islesiwdi ámeliy basqıshqa alıp shıǵıw, turaqlı sóylesiw hám tájiriybe almasıwdı jolǵa qoyıw boyınsha kelisip aldı. Bunday sóylesiwler eki tárepleme qatnasıqlardı bekkemlewde áhmiyetli faktor ekeni atap ótildi.

N.ZIYoDULLAEVA, ÓzA xabarshısı