Ájiniyaz atındaǵı Nókis mámleketlik pedagogikalıq institutında ǵalaba xabar qurallarınıń wákilleri, jurnalistler hám blogerler ushın 2025-2026-oqıw jılı ushın qabıllaw procesine arnalǵan baspasóz konferenciyası bolıp ótti.

Onda institut rektorı Q.Qodirov bıyılǵı qabıllaw procesindegi áhmiyetli jańalıqlar haqqında maǵlıwmat berdi.
Atap ótilgenindey, Ózbekstan Respublikası Prezidentiniń 2024-jıl 24-maydaǵı «Joqarı bilimlendiriw shólkemlerine oqıwǵa qabıllaw hám mámleketlik buyırtpanı jaylastırıw sistemasın jetilistiriw haqqında»ǵı pármanına muwapıq, 2024-2025-oqıw jılınan baslap mámleketlik joqarı hám kásiplik bilimlendiriw mákemelerine (kásip-óner mektebi buǵan kirmeydi) qabıllaw boyınsha imtixanlar «aldın test, sońınan tańlaw» principi tiykarında bir waqıtta ótkeriliwi belgilendi.
Abiturientler óz tańlawına bola test sınaǵı nátiyjesinde toplaǵan balınan kelip shıǵıp, dáslep joqarı bilimlendiriwdiń bakalavriat tálim baǵdarlarına, soń kásiplik bilimlendiriw mákemelerine oqıwǵa kiriw ushın tańlawda qatnasadı.
Institut rektorı bıyılǵı jılı mámleketlik joqarı oqıw orınları bakalavriatına qabıllaw procesi 2 basqıshta ámelge asırılatuǵınlıǵı, ayrıqsha qábilet talap etiletuǵın bakalavriat tálim baǵdarlarına qabıllaw ushın kásiplik (dóretiwshilik) imtixanlar instituttıń ózinde, sonday-aq, basqa tálim baǵdarları boyınsha test sınaqları Bilimdi bahalaw agentligi tárepinen ajıratılǵan orınlarda ótkeriliwi belgilengenligi, olardı shólkemlestiriw boyınsha joqarı dárejede tayarlıqlar alıp barılıp atırǵanlıǵın atap ótti.
Sonday-aq, qabıllaw procesin joqarı dárejede shólkemlestiriw, abiturientler hám olardıń ata-analarına áhmiyetli másláhátler, huqıqıy jol-jobalar, tarawdaǵı jańalıqlar hám ózgerisler haqqında tolıq maǵlıwmat beriw maqsetinde institutta qabıllaw komissiyası hám onıń quramında másláhát jáne koll-oraylarınıń jumısı jolǵa qoyılǵanlıǵı, bul oraylar hár kúni saat 09:00 den 18:00 ge shekem turaqlı jumıs islep turǵanlıǵı boyınsha maǵlıwmat berdi.
Ilajda qabıllaw procesindegi jańalıqlar hám ózgerisler haqqında ǵalaba xabar quralları wákilleri ózleriniń qızıqtırǵan sorawlarına juwap aldı.
Ilajda institut rektorı Q.Qodirov barlıq qatnasıwshı jurnalist hám blogerlerdi 27-iyun – Baspasóz hám ǵalaba xabar quralları xızmetkerleri kúni bayramı menen qutlıqladı hám dóretiwshilik jumıslarında tabıslar tiledi.
Bayram keshesinde mámleketimizde joqarı bilimlendiriw tarawında, sonıń ishinde, institutta ámelge asırılıp atırǵan jumıslar, tarawdaǵı reformalardıń nátiyjelerin xalqımızǵa joqarı dóretiwshilik sheberligi menen jetkerip beriwde ayanbay xızmet etip atırǵan jurnalistler, texnikalıq xızmetkerler, blogerlerge institut rektoratı hám kásiplik awqamı komiteti arasında dúzilgen jámáátlik shártnama tiykarında bayram sawǵaları hám húrmet jarlıqları tapsırıldı.
Óz gezeginde, dóretiwshi kásip iyeleri bayram qarsańında kórsetilip atırǵan usınday itibar ushın institut jámáátine minnetdarshılıǵın bildirdi.

Qaraqalpaqstan xabar agentligi.