Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov hám Amerika Qurama Shtatlarınıń “Citi” banki qarıydarlar boyınsha direktorı Devid Livingston basshılıǵındaǵı delegaciya aǵzaları arasında ushırasıw ótkerildi.

Sóylesiwler waqtında eki tárepleme birge islesiw qatnasıqların rawajlandırıw, ámelge asırılǵan joybarlardıń nátiyjelerin bahalaw hám keleshektegi tiykarǵı baǵdarlardı belgilew máseleleri dodalandı. Sonday-aq, Ózbekstandaǵı ekonomikalıq rawajlanıw processleri boyınsha da pikir alısıldı.
Ushırasıwda tárepler bir qatar áhmiyetli máselelerge ayrıqsha itibar qarattı. Sonıń ishinde, Ózbekstanda alıp barılıp atırǵan sociallıq hám ekonomikalıq reformalardı izbe-iz dawam ettiriw, menshiklestiriw processlerin jedellestiriw, mámleket qatnasıwındaǵı kárxanalardı rawajlandırıw hám olardıń básekige shıdamlılıǵın arttırıwǵa keń itibar berildi.
Sóylesiw waqtında elektr támiynatınıń sapasın jaqsılaw, xalıqtı taza ishimlik suwı menen támiyinlew sıyaqlı joybarlardı mámleketlik-jeke menshik sheriklik tiykarında ámelge asırıw áhmiyetli ekenligi atap ótildi. Jeke menshik sektordı hár tárepleme qollap-quwatlaw máselesi de ayrıqsha tilge alındı.
Sonday-aq, xalıqaralıq suveren reyting agentlikleri menen birge islesiwdi kúsheytiw, Ózbekstannıń Jáhán sawda shólkemine aǵza bolıw procesin qollap-quwatlaw hám inflyaciya dárejesin tómenletiw jáne ekonomikalıq turaqlılıqtı támiyinlew baǵdarında tájiriybe almasıw máseleleri boyınsha da pikir alısıldı.
Ministrlik málimleme xızmetiniń xabarına bola, bul bank AQShtaǵı eń iri banklerden biri bolıp, ol Citigroup Inc. finanslıq xolding kompaniyasınıń quramına kiredi. Bank xalıqaralıq kólemde finanslıq xızmetler kórsetiwge qánigelesken hám dúnyanıń kóplegen mámleketlerinde óz filiallarına iye.
Ushırasıw juwmaǵında tárepler óz-ara paydalı birge islesiwdi jáne de bekkemlew hám joqarıdaǵı baǵdarlarda turaqlı sóylesiwdi dawam ettiriwge kelisip aldı.

N.Ziyodullaeva tayyorladi,
ÓzA