Usı jıldıń ǵálle tapsırıw máwsiminde respublikamızdıń bir qatar rayonları mámleketke ǵálle tapsırıw rejesin artıǵı menen orınladı.
Ámiwdárya rayonı birinshilerden bolıp rejeni tolıq hám artıǵı menen orınlaǵan aymaq boldı. Rayonda 11130 tonna ǵálle tapsırıw belgilengen bolıp, pidáker diyqanlar hám fermer xojalıqlarınıń tınımsız háreketi menen reje 117 procentke orınlandı. Bul bolsa 13 mıń tonnadan artıq ǵálle jetkerip berilgenin ańlatadı.
Al, Ellikqala rayonı diyqanları da nátiyjeli miynet úlgisin kórsetip, belgilengen 8810 tonna ornına rejeni 106,6 procentke orınladı.
Beruniy rayonı bolsa, tap usınday muǵdarda, yaǵnıy 8810 tonnalıq rejeni 105,4 procentke orınlap, ulıwma nátiyjege salmaqlı úles qostı.
Taqıyatas rayonı belgilengen 2635 tonna ornına rejeni 125 procentke orınladı.
Moynaq rayonı da artta qalmadı. Rayon ózine júklengen rejeniń 101 procentin orınlawǵa eristi. Bul jerde de mol zúráát alıw hám onı óz waqtında tapsırıw ushın barlıq imkaniyatlar iske qosıldı.
Shınında da, rayonlarda mámleketke ǵálle tapsırıw procesi sistemalı hám basqıshpa-basqısh alıp barılmaqta. Bul jetiskenlikler – miynetkesh diyqanlar, pidáker agronomlar, suwshılar hám basqa da qánigelerdiń miynetiniń nátiyjeli juwmaǵı bolıp esaplanadı.
Bul tabıslar ǵálle jetistiriwde agrar siyasattıń durıs jolǵa qoyılǵanınan hám fermer xojalıqlarına kórsetilip atırǵan ámeliy járdemlerden dárek beredi.

Qaraqalpaqstan xabar agentligi.