Ullı oyshıl, shayır hám mámleketlik ǵayratker Mir Áliysher Nawayı «Adamdı qıynap kiyatırǵan mashqalalar ádil sheshilip, onıń qádiri óz ornına qoyılsa, álbette, el shad, mámleket abat boladı, dep jazǵan edi.

Haqıyqatında da adam múnásip sharayatta tálim-tárbiya alıp, abadan turmıs keshirgende ǵana, jámiyet hám mámleket birgelikte turaqlı rawajlanadı.
Ózbekstan Respublikası Prezidenti Sh.Mirziyoev «Insan – mámleket hám jámiyet ushın maqsetke erisiw quralı emes, kerisinshe, áne usı maqsettiń bas mazmunı hám dáregi jáne de eń joqarı qádiriyat bolıwı lazım.Bizler qurıp atırǵan Jańa Ózbekstan ushın insan qádiri hám xalıq mápi hámme nárseden ústin esaplanadı. Sonlıqtan insan qádirin joqarılatıw haqıyqatında da mámleketlik hákimiyat uyımlarınıń Konstituciyalıq minneti hám baslı wazıypası bolıwı shárt.»-degen edi.
Sol aytqanınday sońǵı jılları elimizde húrmetli Prezidentimizdiń basshılıǵında xalqımızdıń tınısh hám abadan turmısta jasawın támiyinlew baǵdarında kóplegen iygilikli isler ámelge asırılmaqta. Mámleketimizdiń barlıq aymaqları sıyaqlı, Nókis qalasındaǵı Baǵshılıq mákan puqaralar jıyınında da sońǵı jılları insan-qádirin joqarılatıw baǵdarında burın tariyxta bolmaǵan iygilikli isler ámelge asırılmaqta.
-Jıyın aymaǵında búgingi kúni 517 xojalıqta 2897 xalıq jasaydı,-deydi jıyın baslıǵı Abzatdin Dáwletov.-1977-78-jıllarǵa shekem bul aymaq Nókis rayonına qaraslı bolıp, úyler awıldaǵı xojalıqlar sıyaqlı shashaw otırǵan. Sońınan aymaq Nókis qalasına qosılǵannan keyin, bul jerde xojalıqlar sanı kóbeyip, kóplegen úyler nızamsız túrde salına bergen. Húrmetli Prezidentimizdiń 2018-jıl 20-apreldegi «Puqaralardı sociallıq qollap-quwatlaw boyınsha qosımsha ilajlar hám de ózbasımshalıq penen qurılǵan turaq jaylarǵa qarata múlk huqıqın tán alıw boyınsha bir mártelik ulıwma mámleketlik akciyasın ótkeriw haqqında»ǵı pármanı tiykarında, aymaǵımızda jasawshı 434 xojalıqtıń kadastr hújjetleri jańadan islep berildi. Kósheler tártipke keltirilip, Nawrız, Abadanlastırıw, Balıqshı, Tatıwlıq, A.Qunnazarov kósheleri jańadan asfaltlandı. Sáwir, Qıpshaq, Baxıtlı, Baǵshılıq, Shadlıq, Tuyıq Sáwir kóshelerine qum-shaǵıl tas aralaspası tóselip, xojalıqlarǵa jańadan ishimlik suwı tarmaqları tartıldı.
Ózbekstan Respublikası Ministrler Kabinetiniń 2023-jıl 2-fevraldaǵı 52-sanlı qararı tiykarında, aymaǵımızda jasawshı 32 xojalıqtıń jaylarınıń tóbeleri shiferlanıp berildi.
-Bunnan 20 jıl burın ómirlik joldasım qaytıs bolıp, úsh balam menen qalǵan edim,-deydi Kómekbay Baltaniyazov.-Sonnan berli, úydiń ǵalma-ǵalshılıǵı menen jayımızdı shiferlay almay kiyatırǵan edim. Mine, búgin Tashkent qalasınıń qáwenderligi hám Nókis qalası hákimliginiń járdemi menen jayımızǵa jańadan shifer qaǵıp berilmekte. Bunıń ushın húrmetli Prezidentimizge, respublika basshıları, qala hákimligi hám jıyın aqsaqalına úlken raxmet aytaman.
Shınında da insan qádiri eń joqarı qádiriyat bolǵan elimizde usınday iygilikli isler hár kúni ámelge asırılmaqta. Bul bolsa, xalqımızdıń erteńgi kúnge degen isenimin arttırıp, olardı jańa baslamalarǵa qaray baslamaqta.

Adilbay Orazov,
Qaraqalpaqstan xabar agentligi sholıwshısı.