Ózbekstanda ekonomikalıq rawajlanıwda isbilermenler áhmiyetli rol atqaradı. Keyingi jılları olar ushın jaratılıp atırǵan qolaylıqlar menen imkaniyatlar nátiyjesinde jergilikli brendler xalıqaralıq bazarlarda óz ornın tappaqta. Isbilermenlerdi qollap-quwatlaw bolsa turaqlı rawajlanıwdı támiyinleydi.

Jaqında Qaraqalpaqstan Respublikası prokurorınıń orınbasarı T.Nurmetov Beruniy rayonındaǵı isbilermenler menen sáwbet ótkerdi hám olardıń mashqalaların úyrendi. Ushırasıwdan soń ol Toqımashı máhállesinde jaylasqan “Oltin saodat asri” JShJnıń jumısı menen tanıstı. Bul kárxana 2019-jıldan berli qurılıs materialların islep shıǵarıw menen shuǵıllanbaqta. Házirgi waqıtta onıń ónimleri tek ǵana jergilikli emes, al basqa da aymaqlarǵa da jetkerip berilmekte. Sonday-aq, kárxana 40 tan aslam jumıssız puqaranı jumıs penen támiyinlegen.
Kárxana basshısı jumısın keńeytiw maqsetinde Prezidenttiń 10-sanlı pármanı tiykarında Toqımashı máhállesinde 0,09 gektar jerdi investiciya kirgiziw shárti menen ajıratıp beriw haqqında Qaraqalpaqstan Respublikası Ministrler Keńesine múrájat etti. Házirgi waqıtta bul másele boyınsha wyreniw jumısları dawam etpekte.

Qaraqalpaqstan xabar agentligi