Bul medicina mákemesi MRT, UZD, EKG, ExoKG, Xoltr EKG, laboratoriya, fizioterapiya, stacionar kardiologiya, balalar terapiyası hám stomatologiya qánigelikleri boyınsha jumıs alıp barmaqda.
Gúlistan Yuldashova basshılıǵında jumıs alıp barıp atırǵan klinika 20 orınǵa iye bolıp, házirgi waqıtta 20 nawqas emlenbekte. Klinikada xalıqqa 4 joqarı maǵlıwmatlı shıpaker, 5 orta medicina miyirbiykesi hám 1 sanitar qánigeler xızmet kórsetip kelmekte.
Oray kapital ońlanǵanı, zamanagóy medicinalıq úskeneler menen támiyinlengeni, qánigelerdiń mamanlıǵın arttırıw, medicinalıq xızmet sapasın jaqsılaw baǵdarında itibarǵa ılayıq jumıslar ámelge asırılǵanı nátiyjesinde rayon xalqına nátiyjeli xızmet kórsetip kelmekte.
Deputatlar basshılıǵındaǵı jumısshı topar aǵzaları úyreniw procesinde oraydaǵı jumıs processleri, keselliklerge shatılǵan nawqaslar menen islesiw, medicina xızmetkerleriniń óz jumısına múnásibeti, juwapkershiligi menen jaqınnan tanıstı. Nawqaslar menen tikkeley sáwbetler ótkerildi. Nawqaslar keselliklerdi erte anıqlaw, nátiyjeli emlew hám profilaktikası boyınsha orayda ámelge asırılıp atırǵan jumıslardan minnetdar ekenligin bildirdi.
– Klinika imaratınıń beyimlestirilgeni, zamanagóy hám aldınǵı medicinalıq úskeneler menen támiyinlengeni, eń áhmiyetlisi, nawqaslar ushın zárúr qolaylı sharayatlar jaratılǵanı itibarǵa ılayıq,-deydi Xalıq deputatları Qońırat rayonlıq Keńesiniń deputatı, Qońırat temir jol emlewxanasınıń bas shıpakeri Sharaf Saparov. Sebebi aldın bunday apparatqa túsiw ushın qońıratlı nawqaslar paytaxtqa barǵan. Endi oǵan zárúrlik qalmadı, nawqaslar júrek-qan tamır keselligi emleniwin usı jerdiń ózinde alıwı múmkin. Bunnan álbette, rayon xalqı, nawqaslar, shıpakerler oǵada quwanıshlı.
Klinikada tabıslar menen bir waqıtta ayırım mashqalalar da joq emes. Jeke menshik klinika baslıǵı G. Yudashovanıń aytıwınsha, zamanagóy apparatlar joqarı quwatlılıqtaǵı elektr quwatlılıǵın talap etedi. Sol sebepli klinikaǵa transformator ornatıw zárúr ekenligi aytıp ótildi. Sonday-aq, isbilermen qosımsha úskeneler satıp alıw hám jumıs túrlerin keńeytiw maqsetinde qosımsha jeńilletilgen kredit alıw tilegin bildirdi. Deputatlar bul máseleni unamlı sheshiw boyınsha juwapkerlerge múrájat etetuǵın boldı.
Kesellikti emlegennen kóre aldın alıw maqsetke muwapıq. Sol sebepli deputatlar shıpakerlerge xalıqtıń medicinalıq mádeniyatın arttırıw boyınsha usınıslar berdi.
Deputatlar basshılıǵındaǵı jumısshı topar orınlarda úyreniw jumısların dawam etpekte.

Qaraqalpaqstan xabar agentligi