Ǵárezsiz Mámleketlerdiń Doslıq Awqamınıń standartlastırıw, metrologiya hám sertifikatlastırıw boyınsha mámleketleraralıq Keńesiniń 67-májilisine Ózbekstan texnikalıq jaqtan tártipke salıw agentliginiń direktorı Akmal Jumanazarov basshılıǵındaǵı delegaciya aǵzaları qatnastı.

Xalıqaralıq ushırasıwda Keńes quramına aǵza milliy uyımlardıń basshıları hám ekspertleri, ǴMDA Atqarıw komiteti, Standartlar byurosınıń wákilleri tárepinen standartlastırıw, metrologiya, sertifikatlastırıw hám akkreditaciya tarawlarınıń jumısın jetilistiriwge baylanıslı máseleler dodalanıp, paydalı qararlar qabıl etildi.
Sonday-aq, ilimiy-texnikalıq hám sawda-ekonomikalıq baylanıslardı bekkemlew, sawdadaǵı texnikalıq tosqınlıqlardı saplastırıw, joqarı mamanlıqtaǵı qánigelerdi tayarlaw hám aǵza mámleketler arasında óz-ara paydalı baylanıslardı keńeytiw máselelerine itibar qaratıldı.
Abıraylı ilaj sheńberinde Ózbekstan texnikalıq jaqtan tártipke salıw agentligi direktorı A.Jumanazarov Belarus Respublikası Mámleketlik standart komitetiniń baslıǵı Morgunova Elena Mixaylovna menen de ushırasıw ótkerdi. Onda sawdadaǵı texnikalıq tosqınlıqlardı saplastırıw, eksportshı kárxanalarǵa ónimlerdi sınaqtan ótkeriw hám sertifikatlastırıw máselelerinde qolaylı sharayatlardı jaratıwǵa itibar qaratıldı.
Ushırasıw nátiyjesine bola, texnikalıq jaqtan tártipke salıw, standartlastırıw, metrologiya, sertifikatlastırıw, akkreditaciya, málimleme-kommunikaciya texnologiyaları hám bazar qadaǵalawı tarawlarında kadrlardı qayta tayarlaw hám mamanlıǵın arttırıwǵa kelisip alındı.
Májilis sheńberinde ullı oyshıllarımızǵa baǵıshlanǵan kitaptıń prezentaciyası da bolıp ótti. Onda “Metrologiya rawajlanıwına salmaqlı úles qosqan ullı Shıǵıs oyshılları” hám Áliysher Nawayı shıǵarmalarında alǵa qoyılǵan ilimiy hám filosofiyalıq kózqaraslar, tereń analitikalıq qatnaslardıń anıq dáreklerge súyengenligi hám bul kitaplar oqıwshınıń oy-pikirin bayıtıwǵa xızmet etetuǵını atap ótildi.

Sh.Mamaturopova,
ÓzA