Qazaqstan paytaxtı Astana qalasında Qıtay hám Oraylıq Aziya mámleketleri málimleme agentlikleriniń forumı bolıp ótti. Ilajda “Sinxua” málimleme agentligi, Qazaqstan Respublikası Prezidenti teleradiokompleksi, Qırǵızstannıń “Kabar” milliy málimleme agentligi, Tájikstannıń “Xovar” milliy málimleme agentligi, “MEDIA TURKMEN” málimleme agentligi hám Ózbekstan Milliy málimleme agentligi – ÓzAnıń basshıları qatnastı.

Forumǵa basshılıq etken “Sinxua” málimleme agentliginiń bas direktorı Fu Xua Qıtay Xalıq Respublikası Baslıǵı Si Czinpin hám Oraylıq Aziya mámleketleri jetekshileriniń birgeliktegi háreketleri nátiyjesinde óz-ara baylanıslarda jańa tariyxıy imkaniyatlar hám perspektivalar ashılǵanın ayrıqsha atap ótti. Qıtay hám Oraylıq Aziya mámleketleri málimleme agentliklerine “Oraylıq Aziya-Qıtay ruwxı”n alǵa qoyıw, regionnıń jedel rawajlanıwına járdemlesiw, ulıwma tariyxımızdı birgelikte úgit-násiyatlaw, Qıtay hám Oraylıq Aziya arasındaǵı gumanitarlıq almasıwlar hám civilizaciyalardı óz-ara úyreniwge járdem beriw, innovaciyalar jáne mediatexnologiyalar tarawındaǵı birge islesiwdi bekkemlew, málimleme agentlikleri arasındaǵı sheriklikti keńeytiw, Qıtay hám Oraylıq Aziyanıń ulıwmalıq táǵdirge iye jámiyetin jaratıwǵa úles qosıw sıyaqlı wazıypalar júklengen.
Oraylıq Aziya mámleketleri málimleme agentlikleriniń juwapker wákilleri bul ánjuman óz-ara túsinisiw hám birge islesiwdi bekkemlewde áhmiyetli rol atqaratuǵının atap ótip, Qıtay ǵalaba xabar quralları, sonıń ishinde, “Sinxua” málimleme agentligi menen óz-ara almasıwlar hám birge islesiwdi bunnan bılay da keńeytiw, birgelikte “Oraylıq Aziya-Qıtay ruwxı”n úgit-násiyatlaw, civilizaciyalardı óz-ara úyreniwdi alǵa qoyıw hám ulıwma abadanlıqqa erisiwge óz úlesin qosıwǵa tayar ekenin bildirdi.
Ózbekstan Milliy málimleme agentliginiń bas direktorı Abdusaid Kwchimov ǵalaba xabar quralları eki hám kóp tárepleme birge islesiwdi bekkemlewde áhmiyetli orın iyeleytuǵının atap ótti. Bul forum dawamında Oraylıq Aziyadaǵı hám Qıtaydaǵı media sherikler óz-ara birge islesiwdi bekkemlew hám ulıwma qáwip-qáterlerdi saplastırıw jolların dodalaw ushın bir maydanda jıynaldı.
Forum qatnasıwshıları búgin dúnya úlken ózgerislerdi basınan ótkerip atırǵanı, jalǵan xabarlar tarqatıw menen baylanıslı túrli mashqalalarǵa dus kelip atırǵanına itibar qarattı. Usı kózqarastan, Qıtay hám Oraylıq Aziya mámleketleriniń ǵalaba xabar quralları regionda tınıshlıq hám abadanlıqtı támiyinlew maqsetinde qolaylı málimleme mákanın jaratıw ushın málimleme almasıwı, jańalıqlardı tarqatıw hám texnologiyalıq innovaciyalardı alǵa qoyıw tarawında óz-ara birge islesiwdi bunnan bılay da keńeytiw baǵdarında háreketlerdi birlestiriwi zárúr.
Qazaqstan Respublikası Prezidenti Teleradio kompleksiniń bas direktorı Raushan Kajibaeva tabıslı ótken “Qıtay – Oraylıq Aziya” II sammiti Qıtay hám region mámleketleri arasındaǵı qatnasıqlardı rawajlandırıw baǵdarın belgilep bergenin atap ótti. Bul ánjuman jaqın qońsıshılıq, bekkem doslıqtıń ayqın úlgisi boldı. Ǵalaba xabar quralları bolsa sammit sheńberinde erisilgen nátiyjelerdi qollap-quwatlawı hám olardı turmısqa engiziwge járdemlesiwi kerek.
Qırǵızstannıń “Kabar” milliy málimleme agentliginiń bas direktorı Mederbek Shermetaliev “Bir mákan, bir jol” baslaması óz-ara paydalı birge islesiwdiń jańa sheklerin ashqanın ayrıqsha atap ótti. Málimleme almasıw hám nátiyjeli birge islesiw barlıq táreplerdiń qalıs, haqıyqıy hám tolıq kórinisin qáliplestiriwge imkaniyat beredi.
Tájikstannıń “Xovar” milliy málimleme agentliginiń bas direktorı Subhiddin Shamsiddinzadanıń sózlerine bola, mámleketlerimiz ǵalaba xabar quralları úlken nátiyjelerge eristi. S.Shamsiddinzada tárepler bunnan keyin de kommunikaciyalar tarawında kadrlardı tayarlaw, joqarı oqıw orınları arasındaǵı birge islesiwdi bekkemlew hám kreativ baǵdarlardı rawajlandırıw máseleleri boyınsha óz-ara pikir alısıwına isenim bildirdi.
“MEDIA TURKMEN” málimleme agentliginiń bas direktorı Bekdurdi Amansariev barlıq tárepler málimleme tarawında húrmet, teńlik hám óz-ara mápke tiykarlanǵan birge islesiwdi jolǵa qoyıwda úlgi bolıwı kerek ekenligin, jańa texnologiyalar ǵalaba xabar quralları arasındaǵı birge islesiw mákanın keńeytkenin atap ótip, jańa media tarawındaǵı birge islesiw bekkemleniwine hám sanlı transformaciya processleri jedellesiwine úmit bldirildi.
Forum juwmaǵında Astana konsensusı qabıl etildi.

ÓzA