Tutınıwshılarǵa tábiyǵıy gaz jetkerip beriwdi ele de jaqsılaw hám gaz tarmaqlarında gaz shıǵınların azaytıw maqsetinde «Parkent tájiriybesi» tiykarında «Avtomatlastırılǵan máhálle tutınıw qadaǵalawı balansı» joybarı boyınsha respublikamızda keń kólemli jumıslar alıp barılmaqta.

Usı tájiriybeni sınaw maqsetinde Ámiwdárya rayonındaǵı tábiyǵıy gaz tutınıwshılarına kórsetilip atırǵan xızmettiń sapasın ele de jaqsılaw, xojalıqlarǵa bir tegis tábiyǵıy gaz jetkerip beriw hám tábiyǵıy gazde artıqsha texnikalıq shıǵınlardıń aldın alıw maqsetinde “Arna boyı” máhállesinde “Parkent tájiriybesi” tiykarında jumıslar alıp barıldı.
– Aymaqtaǵı 503 xojalıq tolıǵı menen eki basqıshlı sistemaǵa ótkerilip, aymaqtaǵı 18,7 kilometrlik jer astı hám jer ústi gaz tarmaqları tártipke keltirildi,-deydi Ámiwdárya rayonlık gaz támiynatı bóliminiń bas injeneri Sanjar Raximbaev.
Sonday-aq, gaz támiynatında artıqsha texnikalıq shıǵınlardıń aldın alıw, gaz tarmaqlarındaǵı gaz shıǵıw jaǵdayların saplastırıw, tutınıwshılarǵa bir tegis tábiyǵıy gaz jetkerip beriwge de ayrıqsha dıqqat qaratılǵan. Jáne bul aymaqtaǵı máhállelerdegi xojalıqlarǵa joybar sheńberinde gaz támiynatı sisteması túp-tiykarınan jańalanıp, hár bir xojalıqqa zamanagóy energiya únemlewshi gaz úskeneleri, gaz esaplaw úskenelerine regulyatorlar ornatılıp úsh basqıshlı sistemadan eki basqıshlı sistemaǵa ótkerildi.
Máhálleniń kire berisindegi gaz retlewshi punktke gaz esaplaǵısh ornatılıp, barlıq kóshelerge qadaǵalaw sisteması jolǵa qoyıldı.
Bul avtomatlastırılǵan máhálle tutınıw qadaǵalawı balansı sistemasınıń iske túsiriliwiniń tiykarǵı maqseti – jıllıq gaz shıǵınlarınıń aldın alıw, sonday-aq, tutınıwshılarǵa jetkerip beriletugın tábiyǵıy gaz támiynatın jáne de jaqsılawdan ibarat.
Bul baǵdardaǵı ilajlar orınlarda dawam etpekte.

Á.Jiyemuratov,
Qaraqalpaqstan xabar agentligi