Sońǵı jılları elimizdiń barlıq aymaqları sıyaqlı, Nókis qalası Órnek mákan puqaralar jıyını aymaǵında da kóplegen jańalanıwlar júz bermekte. Aymaqtaǵı ishki jollar ońlanıp, jańadan ishimlik suwı tarmaqları tartıldı.

-Jıyın aymaǵında 743 xojalıqta 2700 ge shamalas xalıq jasaydı,-deydi jıyın baslıǵı Xamid Qusbatırov.-Elatımızda qaraqalpaq, ózbek, qazaq, rus, koreys, tatar, qırǵız hám túrkmen milletiniń wákilleri jasap, óz-ara awızbirshilik penen tınısh-tatıw turmıs keshirmekte.
Húrmetli Prezidentimizdiń 2024-jıl 23-sentyabrdegi 330-sanlı qararı, Ózbekstan Respublikası Ministrler Kabinetiniń 2023-jıl 2-fevraldaǵı 52-sanlı qararı tiykarında, ótken jıldıń ózinde Qoblan kóshesi asfaltlanǵan bolsa, Shılpıq, Qutlı el, Qosbatır, A.Musaev, J. Izentaev hám Tınıshlıq kósheleri betonlandı. Qosbatır, A.Musaev, Qutlı el, Ernazar biy palwan kóshelerine ishimlik suwı tarmaqları tartıldı.
Jıyın xızmetkerleriniń qolaylı sharayatlarda jumıs islewi ushın Tashkent qalası hákimliginiń qáwenderligi menen mákan puqaralar jıyınına jańadan imarat salıp berildi.
Aymaǵımızda jasawshı eki puqaraǵa jańadan jay salınıp berildi.
-Burınǵı jayımız tozıp, tóbesinen qar-jawın ótip ketetuǵın edi,-deydi Júzimgúl Rustemova.- Nókis qalası hákimliginiń qollap-quwatlawı menen Tashkent qalası hákimliginiń qáwenderliginde 4 qabatlı, barlıq qolaylıqlarǵa iye jańa turaq jay salıp berildi. Bunıń ushın húrmetli Prezidentimizge tereń minnetdarshılıq bildiremen.
Shınında da ózlerine kórsetilip atırǵan usınday atalarsha ǵamqorlıqlarǵa kewli tolǵan aymaq xalqınıń quwanıshında shek joq. Olar erteńgi kúnge bekkem isenim menen qádemler taslamaqta.

Adilbay Orazov,
Qaraqalpaqstan xabar agentligi sholıwshısı