Qaraqalpaqstan Respublikası boylap ǵawashanı shılpıw (chekanka) processlerine arnalǵan kórgizbeli hám ámeliy seminarlar ótkerilmekte. Ellikqala rayonındaǵı “Saxtiyon azamati” fermer xojalıǵı aymaǵında ǵawashanı shılpıw (chekanka) processlerine baǵıshlanǵan kórgizbeli seminar bolıp ótti.

Oǵan Qaraqalpaqstan Respublikası Ministrler Keńesi Baslıǵınıń orınbasarı Sh.Teshaev, rayon hákimi, awıl xojalıǵı tarawınıń qánigeleri, tiyisli shólkemlerdiń wákilleri hám fermer xojalıqlarınıń basshıları qatnastı.
Seminar dawamında qatnasıwshılar ǵawasha tárbiyalawdıń áhmiyetli agrotexnikalıq basqıshlarınan biri – shılpıw usılların ámeliyatta baqlap, olardıń abzallıqları menen jaqınnan tanıstı. Bizge belgili, shılpıw zúrááttiń erte hám bir qálipte pisiwin támiyinleytuǵın áhmiyetli agrotexnikalıq ilaj bolıp, ol ónimdarlıqtı arttırıw hám ónimniń sapasın jaqsılawda ayrıqsha áhmiyetke iye.
Seminar dawamında qatnasıwshılar tárepinen bildirilgen sorawlarǵa qánigeler tárepinen tolıq juwap berilip, ámeliy usınıslar bildirildi.
Usı mazmundaǵı seminar “Tórtkúl paxta talshıǵı” JShJ dánshilik klasteri atızlarınıń birinde de ótkerilip, onda zamanagóy agrotexnologiyalardı engiziw, fermerlerge teoriyalıq hám ámeliy bilimler beriw tiykarǵı maqset boldı. Seminar dawamında shılpıw procesin durıs ótkeriw, ósimliktiń biyikligin anıqlaw, zıyan jetkermey qayta islew boyınsha kórsetpeler berildi. Fermerler óz-ara tájiriybe almasıw imkaniyatına da iye boldı.
Beruniy rayonındaǵı Abay awıl puqaralar jıyınındaǵı “Niyatulla Azizbek” fermer xojalıǵı atızlarında hám Ámiwdárya rayonındaǵı “Tolqın” awılında jaylasqan “Amat Twraev” fermer xojalıǵında ótkerilgen seminarlarda da Qaraqalpaqstan Respublikası Ministrler Keńesi Baslıǵınıń orınbasarı Sh.Teshaev, rayon basshıları, agrar tarawı qánigeleri, agronomlar hám jas qánigeler qatnastı.
Fermer xojalıǵındaǵı qatnas – tamır átirapın jumsartıw, artıqsha shaqaların siyrekletiw, zıyankeslerge qarsı biologiyalıq gúresiw sıyaqlı agrotexnikalıq ilajlar seminar qatnasıwshılarında úlken qızıǵıwshılıq oyattı.
Bul seminarlar arqalı fermerler tek ǵana ámeliy bilimlerin bekkemlep, aldınǵı usıllardı úyrenip qalmastan, al óz-ara tájiriybe almasıw, máselelerdi talqılaw hám zamanagóy texnologiyalardı engiziw boyınsha anıq baǵdarlar aldı. Bunday baslamalar aymaqlarda awıl xojalıǵınıń nátiyjeliligin arttırıw, ónimdarlıqtı kóbeytiw hám turaqlı rawajlanıwǵa xızmet etpekte.

Qaraqalpaqstan xabar agentligi.