Qaraqalpaqstan Respublikası sudınıń baslaması menen miynet qatnasıqları tarawında júzege kelip atırǵan kelispewshiliklerdi huqıqıy tiykarda sheshiw, birden-bir sud ámeliyatın qáliplestiriw hám kárxana, mákeme, shólkemlerdegi miynet kelispewshilikleriniń aldın alıw maqsetinde ámeliy oqıw-seminarı shólkemlestirildi.

Ilajda tiyisli ministrlikler, mámleketlik shólkemler, ishki isler uyımları hám sudyalar belsene qatnastı.
Seminardı Qaraqalpaqstan Respublikası sudı baslıǵınıń orınbasarı, puqaralıq isleri boyınsha sudlaw kollegiyasınıń baslıǵı A.Kerimbaev kiris sóz benen ashtı hám alıp bardı.
Oqıw-seminarınıń tiykarǵı maqseti – jańa Miynet kodeksinde belgilengen normalardıń durıs qollanılıwın támiyinlewden ibarat.
Seminarda Qaraqalpaqstan Respublikası sudı sudyası S.Qaypnazarova “Ózbekstan Respublikası Miynet kodeksinde belgilengen miynet shártnamasın jumıs beriwshiniń baslaması menen biykarlaw tártibi” atamasında shıǵıp sóylep, bayanat sheńberinde jumıs beriwshiniń baslaması menen shártnamanı biykarlawdaǵı huqıqıy tiykarlar, sud ámeliyatındaǵı qáte jaǵdaylar hám olardı saplastırıw boyınsha usınıslar berdi.
Ilajda sudya N.Abdakimov tárepinen bolsa “Ózbekstan Respublikası Prezidentiniń 2017-jıl 29-noyabrdegi PQ-3413-sanlı qararı menen tastıyıqlanǵan “Ishki isler uyımlarında xızmetti ótew tártibi haqqında”ǵı Rejeniń áhmiyeti” atamasında shıǵıp sóylep, xızmetti ótew, tayınlaw, attestaciya, dem alıs hám huqıqıy qorǵaw mexanizmleri hár tárepleme tallandı.
Sonday-aq, seminarda miynet shártnamaların biykarlawdaǵı huqıqıy talaplar, sud ámeliyatındaǵı jumısqa tiklew jaǵdayları, ishki isler uyımlarında xızmet kórsetiw menen baylanıslı miynet qatnasıqları, xızmetkerlerdiń huqıqıy qorǵalıwın támiyinlewdiń ámeliy mexanizmleri sıyaqlı áhmiyetli máseleler de kórip shıǵıldı.
Ilaj juwmaǵında qatnasıwshılar miynet qatnasıqları tarawındaǵı jańalıqlardıń ámeliyatqa engiziliwi boyınsha pikir alıstı. Sud ámeliyatın jetilistiriw, xızmetkerler hám jumıs beriwshiler arasındaǵı kelispewshiliklerdiń aldın alıw, sonday-aq, bunday seminarlardı turaqlı túrde ótkeriw zárúrligi ayrıqsha atap ótildi.
Bul ilaj miynet tarawında huqıqıy sawatlılıqtı arttırıw, ámeliyatta ushırasatuǵın kelispewshiliklerdiń aldın alıw, huqıqıy sheshimlerdi úgit-násiyatlawda úlken áhmiyetke iye boldı.

Qaraqalpaqstan xabar agentligi