Boyan tamırınıń quramı paydalı elementlerge bay bolıp, ol farmacevtika tarawında keńnen qollanılıp kelinbekte. Ózbekstan Respublikası Ministrler Kabinetiniń 2019-jıl 15-fevraldaǵı «Boyan tamırı hám basqa da dárilik ósimliklerdi jetistiriw hám sanaat usılında qayta islewdi nátiyjeli shólkemlestiriwge baylanıslı qosımsha ilajlar haqqında» ǵı qararı tiykarında respublikamızda bul ónimdi jetistiriw, jıynaw hám eksport etiw baǵdarında kólemli jumıslar alıp barılmaqta.
Respublikamızda boyan tamırın jıynaw hám onı qayta islep, tayar ónimdi eksportqa shıǵarıwǵa itibar qaratılmaqta. Usı baǵdarda Taqıyatas rayonında investiciya tiykarında «Licorice Trade expo ” juwapkershligi sheklengen jámiyeti tárepinen ulıwma bahası 3,9 mlrd sum bolǵan boyan tamırın qayta islew joybarı iske túsiriliwi nátiyjesinde tayar ónimdi eksportqa shıǵarıw jumısları alıp barılmaqta. Házirgi waqıtta kárxanada qıtaylı investorlar tárepinen texnologiyalar alıp kelinip, injenerler tárepinen onı qurıw jumısları alıp barılmaqta. Sonday-aq, bul jerde házir jumıssız hayal-qızlardıń bántligi támiyinlenip, olar qol miyneti menen boyan tamırın saylap alıw hám tazalaw jumısların alıp barmaqta.
-Bul jerge jumısqa ótkenime kóp waqıt bolǵanı joq. Jumıssız, úy biykesi edim. Jumıs penen támiyinlengenim ushın quwanıshlıman. Is haqılarımızdı waqtında alıp turmız. Kárxana tolıq iske tússe ele de kóplegen hayal-qızlardıń jumıs penen támiyinleniwi kútilmekte,-deydi brigadir Bazargúl Babaeva.
Kárxanada qızǵın jumıs barısı kózge taslandı. Jaqın arada texnologiyalar iske túsip, tolıq jumıs baslansa Taqıyatastan tayar boyan tamırı eksportqa shıǵarılıwı kútilmekte. Demek, bul degeni ekonomikada elimizdiń jáne bir rayonınan sırt el bazarına jáne bir jol ashıladı.

Gúlnara Turdıshova, Qaraqalpaqstan xabar agentligi sholıwshısı
Maqset Habibullaevtıń túsirgen súwretleri