Búgingi kúnde Ózbekstanda mámleketlik uyımlardıń jumısında ashıq-aydınlıq hám jámiyetshiliktiń qatnasın támiyinlewge ayrıqsha itibar qaratılmaqta. Mine, usınday áhmiyetli baslamalardan biri Básekini rawajlandırıw hám tutınıwshılardıń huqıqların qorǵaw komiteti tárepinen puqaralıq jámiyeti institutları menen birge islesiw kúsheytilgeni bolıp esaplanadı. Bul birge islesiw tarawdaǵı reformalardı jáne de nátiyjeli hám ashıq-aydın etiwge xızmet etedi.

Usınday qatnasta reformalardı alıp barıwǵa Prezidentimizdiń “2021-2025-jıllarda puqaralıq jámiyetin rawajlandırıw koncepciyasın tastıyıqlaw haqqında”ǵı hám “Puqaralıq jámiyeti institutların mámleket tárepinen qollap-quwatlaw sistemasın bunnan bılay da jetilistiriw ilajları haqqında”ǵı pármanları baslı baǵdar bolmaqta. Hár eki pármanda belgilengen wazıypalardı ámelge asırıw boyınsha medicinalıq xızmetler tarawında tutınıwshılardıń belgisiz sheńberdegi huqıqların qorǵaw, tarawlıq nızamshılıq hújjetleriniń orınlanıwın támiyinlew hám kórsetilip atırǵan xızmetlerdiń tiykarın bahalawǵa qaratılǵan bir qatar sociallıq joybarlardı ámelge asırıw boyınsha Báseki komiteti tárepinen sociallıq buyırtpalar qáliplestirildi.
Bul sociallıq joybarlar arqalı medicina tarawında xalıqqa kórsetilip atırǵan xızmetlerdiń sapasın úyreniw, puqaralardıń huqıqları támiyinlenip atırǵan dárejesin tallaw, sonday-aq, bul xızmetlerdiń nızamshılıqqa muwapıqlıǵın qalıs bahalawǵa qaratılǵan ilajlardı ámelge asırıw názerde tutılǵan.
Usı baslamalar sheńberinde Ózbekstan Tutınıwshılardıń huqıqların qorǵaw jámiyetleri federaciyası hám Tashkent qalalıq tutınıwshılardıń máplerin qorǵaw orayı tárepinen islep shıǵılǵan aldınǵı sociallıq sheriklik joybarları Komitet tárepinen qollap-quwatlandı.
Ámelge asırılıp atırǵan bul joybarlar, puqaralarǵa kórsetilip atırǵan medicinalıq xızmetlerde ashıq-aydınlıqtı támiyinlew tutınıwshılardıń máplerin qorǵawda jámiyetlik qadaǵalawdı kúsheytiw hám tarawǵa baylanıslı huqıqıy sananı arttırıwda úlken áhmiyetke iye bolmaqta.
Mámleket hám puqaralıq jámiyeti institutları arasındaǵı birge islesiwdiń turaqlılıǵı hám sociallıq joybarlardıń tabısı mámlekette sociallıq turaqlılıqtı támiyinlewge, xalıqtıń turmıs dárejesin arttırıwǵa hám global básekige shıdamlılıqtı kúsheytiwge úlken úles qosadı.

ÓzA