Beruniy rayonındaǵı Abay awıl puqaralar jıyını aymaǵındaǵı “Niyatulla Azizbek” fermer xojalıǵı atızlarında ǵawashalardı tárbiyalawdıń áhmiyetli basqıshlarınıń biri bolǵan shılpıw (chekanka) ilajların sapalı shólkemlestiriw boyınsha ámeliy seminar bolıp ótti.

Oǵan Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máselelerine boyınsha orınbasarı Sh.Teshaev qatnastı.
Seminar dawamında jetekshi agronomlar hám tájiriybeli fermerler tárepinen ǵawashanıń vegetaciyalıq dáwirinde ótkeriletuǵın shılpıw jumıslarınıń agrotexnikalıq tiykarları, bul procestiń ónimdarlıqqa tikkeley tásiri, sonday-aq, jergilikli sharayattaǵı eń nátiyjeli usıllar haqqında maǵlıwmatlar berildi.
Bul seminar tek ǵana tájiriybe almasıw maydanına emes, al aymaqtaǵı basqa fermer xojalıqları ushın da aldıńǵı usıllardı úyreniw imkaniyatına aylandı.
Seminarda fermerlerdiń pidákerli miynetleri joqarı bahalanıp, awıl xojalıǵında nátiyjelilikti arttırıw ushın bunday seminarlardı ótkeriw zárúr ekenligi atap ótildi.
Qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi