Qaraqalpaqstan Respublikası Joqarǵı Keńesi, Ózbekstan Respublikası IIM Jámiyetlik qáwipsizlik departamenti hám Qaraqalpaqtan Respublikası IIM tárepinen ishki isler uyımlarına biriktirilgen jaslardıń qatnasıwında “Hámmemiz birgemiz – Watan bekkem!” súreni astında bir qatar mádeniy-aǵartıwshılıq hám sport ilajları ótkerildi.

Ilaj qatnasıwshıları avtokárwan menen Taxtakópir rayonındaǵı Dáwqara awıl puqaralar jıyını aymaǵında jaylasqan «Qaratereń» ekoturizm kompleksine alıp barıldı.
Ol jerde jaslardıń Jol háreketi qaǵıydaları boyınsha bilim kónlikpelerin anıqlaw maqsetinde viktorina oyınları hám estafetalıq sport jarısları ótkerildi.
Jaslardı bir maqset jolında birlestirgen ilajda elimizge belgili qosıqshılar tárepinen usınılǵan yoshlı qosıqlarǵa jaslar oyınǵa túsip, kewilli hám mazmunlı dem aldı.
Haqıyqıy bayram keypiyatın jaslarǵa inam etken ilajda ótkerilgen tańlaw hám jarıslardıń jeńimpazları, belsendi jaslar shólkemlestiriwshiler tárepinen diplom hám bahalı sawǵalar menen sıylıqlandı.
– Men 2002-jıldan berli muǵallim bolıp islep kiyatırman. Bıyıl oqıwshılarımnıń biri G.Muratbaeva «Jas huqıqtanıwshı» olimpiadasına qatnasıp, sıylı birinshi orındı iyelegen edi. Usı ótkerilgen ilajda ol da shólkemlestiriwshiler tárepinen sıylıqlanıp, xoshametlendi. Álbette, oqıwshılarımızdıń usınday jetiskenlikleri bizlerdi quwandıradı. Belsendi jaslar qatarında «Qaratereń»ge sayaxat shólkemlestirilip, oǵan qatnasıp atırǵanımızdan quwanıshlımız. Bul jerde oqıwshılarımız kóp doslar, tanıslardı arttırıp, bir-biri menen sáwbetlesip, sayaxat etip kewilli, mazmunlı dem aldı,-deydi Kegeyli rayonındaǵı 19-sanlı ulıwma bilim beriw mektebiniń huqıqtanıw páni muǵallimi G.Jaqsımuratova.
Maǵlıwmat ushın, Ishki isler ministriniń tiyisli buyrıǵı menen respublikamızdaǵı 452 mákan hám awıl puqaralar jıyınlarında jasawshı 485 jas ishki isler uyımlarınıń 43 basshı xızmetkerlerine biriktirilgen. Bul jaslar menen individual túrde ushırasıp, olardı jumısqa ornalastırıw, kásip-ónerge oqıtıw, isbilermenlik jumısları baslawı ushın kredit ajıratılıwına járdem berilmekte. Jaslardıń usı baǵdardaǵı hám basqa da 200 den aslam mashqalaları anıqlandı. Ámelge asırılǵan ilajlar nátiyjesinde usı jıldıń 5 ayı dawamında 30 ǵa shamalas jas jumısqa ornalastırıldı, altawı kásip-ónerge oqıtılmaqta hám 36 jastıń basqa máseledegi mashqalaları unamlı sheshildi.
Álbette, jaslar elimizdiń keleshegi. Sonlıqtan da, olardıń tálim-tárbiyası mámleketlik siyasat dárejesine kóterilgen. Olardıń erteńgi aydın keleshegin bekkemlewde, sonday-aq, Watansúyiwshilik ruwxında tárbiyalawda mine, usınday ilajlardıń tutqan ornı áhmiyetli.

Á.Jiyemuratov,
Qaraqalpaqstan xabar agentligi.