Samarqand qalasında Birlesken Milletler Shólkeminiń “2030-jılǵa shekem bes jıl: Turaqlı keleshek ushın mámleketlik xızmetlerdi kórsetiwdi jedellestiriw” temasındaǵı Mámleketlik xızmet forumı (UNPSF 2025) óz jumısın basladı.

BMSh Ekonomikalıq hám sociallıq máseleler departamenti (UNDESA), Ózbekstan Respublikası Sanlı texnologiyalar ministrligi, Prezident janındaǵı Mámleketlik xızmetti rawajlandırıw agentligi hám Strategiyalıq reformalar agentligi menen birgelikte shólkemlestirilgen forumda Evropa, Aziya, Latın Amerikası hám Afrika mámleketlerinen ministrler hám mámleketlik xızmetke juwapker uyımlardıń basshıları, xalıqaralıq hám regionallıq shólkemler, ilimiy toparlar, puqaralıq jámiyeti, jeke menshik sektor wákilleri qatnaspaqta.
Ánjuman aldında Ózbekstan Respublikası Prezidenti Shavkat Mirziyoevtiń forum qatnasıwshılarına qutlıqlawın Prezident járdemshisi Saida Mirziyoeva oqıp esittirdi.
Qutlıqlawda mámleketlik basqarıwda sanlı transformaciyanı xoshametlew, mámleketlik xızmetlerdi kórsetiwdiń innovaciyalıq sheshimlerin qollanıw, mámleketlik sektor institutlarında nátiyjelilikti keskin arttırıw, liderlik basqarıw usılın rawajlandırıw, úzliksiz bilim alıwdı keńeytiw hám bolajaq basshılar ushın zárúr kónlikpelerdi belgilew boyınsha aldınǵı tájiriybe almasıw hár qashanǵıdan da ayrıqsha áhmiyetke iye ekeni atap ótilgen. “Mámleket – xalıq ushın” principine qatań ámel etip kiyatırǵan Jańa Ózbekstan mámleketlik xızmet tarawında global ózgerislerdiń ajıralmas bólegine aylanıp atırǵanı ayrıqsha atap ótilgen.
Forumnıń ashılıwında, sonday-aq, BMShtıń Ekonomikalıq hám sociallıq máseleler departamenti bas xatkeriniń ekonomikalıq rawajlanıw boyınsha járdemshisi Navid Hanif, Malayziya Bas ministriniń orınbasarı Fadillah Yusuf shıǵıp sóylep, ánjuman jumısına tabıs tiledi.
Ózbekstan Respublikası sanlı texnologiyalar ministri Sherzod Shermatov mámleketimizde mámleketlik xızmetti rawajlandırıw baǵdarında alıp barılıp atırǵan jumıslar hám olardıń nátiyjeleri haqqında sóz etti.
– Keyingi bes jılda bir qatar nızam hújjetleri qabıl etilip, onlaǵan jıllarǵa teń jumıslar ámelge asırıldı, – dedi Sh.Shermatov. – “Sanlı húkimet” uyımlararalıq integraciya platforması arqalı 49 mámleketlik uyımlardıń 390 dan aslam veb-xızmetleri ámelge asırılmaqta, olarǵa hár kúni 216 dan aslam málimleme sistemaları jalǵanadı. Birden-bir interaktiv mámleketlik xızmetler portalı (my.gov.uz) arqalı puqaralar hám isbilermenlik subektleri 760 tan aslam elektron xızmetlerden paydalanıw imkaniyatına iye bolıp, dizimnen ótken paydalanıwshılardıń sanı 11 millionnan astı. Biz 2030-jılǵa shekem sanlı texnologiyalar eksportın 5 milliard dollarǵa jetkeriwdi maqset etkenbiz, usı jılı bul kórsetkish 1 milliard dollardan artıwı kútilmekte. Nızam hújjetleri maǵlıwmatlarınıń milliy bazasında keń jámiyetshilik hám professional yuristler ushın ashıq bolǵan jasalma intellektke tiykarlanǵan sanlı járdemshi tabıslı engizildi. Rawajlanǵan 208 Mámleketlik xızmetler orayları tarmaǵı respublika boylap hákimshilik xızmetlerden offlayn rejimde paydalanıw imkaniyatın berdi. 2024-jılı Ózbekstan birinshi márte Elektron húkimetti rawajlandırıw reytinginiń «júdá joqarı» dárejesine iye mámleketlerdiń toparına kirdi hám GovTech jetiklik indeksinde 37 tekshege kóterilip, «A» kategoriyasına kirdi.
Ózbekstan sanlı texnologiyalar ministri forumnıń Samarqand deklaraciyası haqqında maǵlıwmat berdi hám ol sanlı transformaciya, innovaciya hám jańa texnologiyalar, isenimli mámleketlik basqarıw, inklyuzivlik hám texnologiya, kiberqáwipsizlik sıyaqlı jeti maqsetten ibarat ekenin atap ótti. Bunnan soń forum sektorlarda óz jumısın dawam ettirdi. Úsh kún dawamında konferenciyada “Mámleketlik basqarıwda innovaciyalar: nátiyjelilik, ashıq-aydınlıq hám esap beriwdi arttırıwda sanlı qurallar hám jasalma intellekttiń roli”, “Sońǵı milya”ǵa erisiw: barlıq xalıqqa xızmetlerdi keńeytiw boyınsha xalıqaralıq tájiriybe”, “Reformalardı jedellestiriw: innovaciyalıq laboratoriyalar arqalı basqarıwdı transformaciyalaw” temaları dodalanadı.
– BMShtıń Mámleketlik xızmet forumı 2003-jıldan berli hár jılı dástúriy túrde ótkeriledi hám bıyıl birinshi márte Ózbekstan bul abıraylı ánjumanǵa basshılıq etpekte, – deydi Prezident janındaǵı Mámleketlik xızmetti rawajlandırıw agentligi departament baslıǵınıń orınbasarı Muhsina Husanova. – Forumda qatnasıw ushın 70 ten aslam mámleketten wákiller kelgen, bunnan tısqarı, kóplegen xalıqaralıq shólkemlerdiń basshıları hám ekspertler qatnaspaqta.
Ilaj sheńberinde tiykarǵı májilis hám seminarlar menen birge ministrler, xalıqaralıq shólkemlerdiń wákilleri menen ushırasıwlar, bir qatar prezentaciyalar ótkeriledi. Mámleketimizde BMShtıń turaqlı rawajlanıw maqsetlerine erisiw baǵdarında ámelge asırılǵan jumıslar tallanıp, tájiriybe almasıw da názerde tutılǵan. Forum dástúrine bola, bıyıl elektron húkimet tarawındaǵı jetiskenlikleri ushın 12 mámleketti UNDESA tárepinen sıylıqlaw máresimi boladı.
– BMShtıń mámleketlik xızmet forumı bir yamasa birde-bir mámlekette bul baǵdarda alıp barılıp atırǵan jumıslardı tallawǵa baǵıshlanbaǵan, al turaqlı rawajlanıw maqsetlerine erisiw ushın dúnya mámleketlerinde bolıp atırǵan reformalar hám onıń nátiyjelerin úyreniw, óz-ara tájiriybe almasıwǵa qaratılǵan, – deydi Rossiya Federaciyası Prezidenti janındaǵı Rossiya xalıq xojalıǵı hám mámleketlik xızmet akademiyasınıń prorektorı Andrey Margolin. – Óytkeni sizde pikir bolsa, mende de pikir bar, sizde usınıs bolsa mende de soǵan jarasa usınıs bolıwı múmkin. Biraq búgin Ózbekstanda ekenbiz, mámleketlik xızmet tarawı boyınsha bul mámlekette erisilip atrıǵan nátiyjelerdi tán alıw kerek, dep oylayman.
Usı jerde men Prezidenttiń virtual qabıllawxanası xalıq penen jaqınnan pikirlesiwde oǵada qolaylı platforma ekenin atap ótiwdi qáler edim. Ekinshi mısal, bir waqıtları tiykarınan paxta shiyki zatın satqan Ózbekstan búgin óndiris jedel rawajlanǵanı sebepli qońsı mámleketlerden paxta talshıǵın satıp alıp atırǵanı. Bul mámlekette mámleketlik basqarıw durıs hám nátiyjeli jolǵa qoyılǵanınan dárek beredi, dep oylayman.
Forumda xalıqaralıq birge islesiwdi bekkemlew, ásirese, rawajlanıp atırǵan mámleketler arasında tájiriybe almasıw hám mámleketlik xızmetlerden teń hám ádil paydalanıwdı xoshametlewge qaratılǵan Samarqand ministrler deklaraciyası dodalanıwı názerde tutılǵan.

Ǵolib HASANOV, ÓzA xabarshısı