Mámleketimiz tárepinen xızmet kórsetiw tarawın rawajlandırıw maqsetinde isbilermenlerge kóplegen jeńillikler jaratılǵan bolıp, olardıń jumısın qollap-quwatlaw boyınsha keń kólemli jumıslar ámelge asırılmaqta.

Beruniy rayonında bahası 5,5 milliard sumnan aslam bolǵan iri xızmet kórsetiw joybarı ámelge asırılıw aldında tur.

Ózbekstan Respublikası Prezidentiniń 129-sanlı pármanı menen tastıyıqlanǵan tártipke muwapıq, usı joybar sheńberinde isbilermenge tikkeley jer ajıratılıp, qurılıs jumısların baslaw ushın ruqsat berildi. “Shabboz Invest” JShJ tárepinen ámelge asırılıp atırǵan qurılıs jumısları búgingi kúnde jedel pátlerde dawam etpekte.
– Qurılısımızdıń derlik 70 procentin juwmaqladıq. Joybardıń tolıq iske túsiriliwi menen 20 adam turaqlı jumıs penen támiyinlenedi. Mámleketimizde isbilermenlerge jumıs islewi ushın barlıq sharayatlar jaratılǵan. Jaratılǵan usınday imkaniyatlar ushın Prezidentimizge minnetdarshılıq bildiremiz, – deydi “Shabboz Invest” JShJ basshısı O.Sultanov.
Joybardıń tabıslı ámelge asırılıwı nátiyjesinde tek ǵana rayon aymaǵında xızmet kórsetiw tarawınıń rawajlanıwı emes, al jańa jumıs orınlarınıń jaratılıp, jergilikli xalıqtıń bántligin támiyinlewde áhmiyetli qádem bolıwı kútilmekte. Sonday-aq, mámleket tárepinen berilgen jeńillikler hám qolaylıqlar isbilermenlik subektleriniń jumısın bunnan bılay da keńeytiwge xızmet etpekte.

Qaraqalpaqstan xabar agentligi