Házirgi waqıtta tiyisli taraw qánigeleri tárepinen xalıq arasında tábiyǵıy resurslardan aqılǵa uǵras paydalanıw, jeke xojalıqlardıń ısıtıw qazanxanalarına energiya únemlewshi gaz úskenelerin, yaǵnıy gorelkalardı ornatıw boyınsha úgit-násiyat jumısları alıp barılmaqta.

Sonıń menen birge, gazdi únemlew, artıqsha texnikalıq shıǵınlardıń aldın alıw boyınsha da xojalıqlarǵa ornatılǵan elektron gaz esaplaw úskenelerine regulyatorlar ornatılıp, onı modernizaciyalaw jumısları alıp barılmaqta.
Bıyıl Ámiwdárya rayonı aymaǵındaǵı 647 xojalıqtı 3 basqıshlı sistemadan 2 basqıshlı sistemaǵa ótkeriw rejelestirilgen. Házirgi waqıtta aymaqlarda bul boyınsha da jumıslar alıp barılmaqta. Búgingi kúnge kelip 400 den zıyat xojalıqqa regulyatorlar ornatıldı. Jıl aqırına shekem bul jumıslar tolıq juwmaqlansa, 14400 metr kub gazdiń únemleniwine erisiledi.
Búgingi kúnde mámleketimizde tábiyǵıy gazdi únemlep paydalanıw hám hár bir xojalıqqa bir tegis jetkerip beriw boyınsha keń kólemli ilajlar alıp barılıp atır eken, hár birimiz tábiyǵıy resurslardı únemlep, onıń ısırap bolıwına jol qoymasaq, keleshek áwladlarımızdıń da bul tábiyǵıy resurslardan paydalanıwına tiykar jaratqan bolamız.

Á.Jiyemuratov,
Qaraqalpaqstan xabar agentligi