Shınında da Nókis qalasında hám rayon oraylarında sońǵı jıllarda bir qatar qiri qurılıs-ońlaw, abadanlastırıw jumısları ámelge asırılıp, olardıń kelbeti pútkilley ózgerip barmaqta.

Ótker ásirdiń 80-jılları Nókis qalasınıń arqa sheti burınǵı arqa avtovokzaldıń átirapı bolǵan bolsa, házirgi waqıtta onlaǵan shaqırım arqa tárepke keńeyip, qala jańa kósheler, turaq jaylar menen tolıstı. Qubla hám shıǵıs tárepi boyınsha da sonı ayta alamız.
Qalanıń arqa tárepindegi úlken aylanba joldıń Shımbayǵa ketetuǵın tárepi elsiz, qumlaq jerden ibarat dalańlıq edi. Al, házirgi waqıtta bul jerlerge turaq jaylar salınıp, el kóship kelip, joldaǵı alıs awıl “Shaǵal kópir”ge shekem jeteyin, dep turıptı.
Házirgi waqıtta, Arqa avtovokzaldıń qarama-qarsı tárepinde, Nókis – Shımbay 4R-176 avtomobil jolınıń boyınan reje boyınsha 7 qabatlı 56 kvartiralı 5 turaq jay, 5 qabatlı 40 kvartiralı 8 turaq jay boy tiklemekte.
Búgingi kúnde bul iri obektlerdegi 3-4 turaq jaydıń diywalın óriw jumısları juwmaqlanbaqta. Qalǵanlarınıń jer orınları tayarlanıp, tırnaǵın quyıw jumısları alıp barılmaqta.
– Jámiyetimiz tárepinen 5 qabatlı 40 kvartiralı bir turaq jaydıń qurılıs jumısları alıp barılmaqta,-deydi “Nókis elektrostroy montaj” juwapkershiligi sheklengen jámiyetiniń is basqarıwshısı Salawat Akimov. – Qurılıs jumısları ótken jılı baslanǵan edi. Búgingi kúnge shekem tırnaǵı quyıldı. Diywalı órilmekte. Házirgi waqıtta besinshi qabatınıń diywalın óriw menen bir waqıtta, ayna-esiklerin de qurıp, elektr sımların tartıw hám basqa da ishki jumısların ámelge asırıp atırmız. Qurılıs jumıslarında 35 adam jumıs islemekte. Olar ushın sharayatlar jaratılıp, ıssı awqat penen támiyinlenbekte.
Qurılıs jumısları qızǵın dawam etpekte.

Á.Jiyemuratov,
Qaraqalpaqstan xabar agentligi