“Ózbekneftgaz” akcionerlik jámiyetiniń basshıları hám Qıtay Eksport-import bankiniń baslıǵı CHen Xuayyuy basshılıǵındaǵı delegaciya arasında ushırasıw bolıp ótti.

Sóylesiw waqtında “Ózbekneftgaz” AJnıń házirgi óndirislik jumısı, onıń keleshektegi rawajlanıw rejeleri hám strategiyalıq baǵdarları haqqında sóz boldı.

Onda tárepler ámelge asırılıp atırǵan investiciyalıq baǵdarlamalar hám birge islesiwdi bunnan bılay da keńeytiw imkaniyatların kórip shıqtı. Atap aytqanda, Qıtay kompaniyaları menen ámelge asırılıp atırǵan joybarlardı qarjılandırıw, jańa investiciyalıq baslamalardı qollap-quwatlaw boyınsha bank tárepinen usınıs etiliwi múmkin bolǵan finanslıq mexanizmler dodalandı.
Sóylesiwlerde eki tárep te neft-gaz tarawında óz-ara paydalı, turaqlı hám uzaq múddetli birge islesiwdi bunnan bılay da bekkemlew tilegin bildirdi.

Bunnan soń olar “Ózbekneftgaz” AJ hám Qıtay Eksport-import banki arasında birge islesiw haqqındaǵı kelisimge qol qoydı.

Bul hújjet eki mámleket arasındaǵı energetika tarawındaǵı qatnasıqlardıń jańa basqıshqa kóteriliwinde hám áhmiyetli joybarlardı ámelge asırıwda úlken áhmiyetke iye.

N.ZIYoDULLAEVA, ÓzAnıń xabarshısı