Jaqında Awǵanstannıń Mozori-Sharif qalasında Ózbekstan elektrotexnika sanaatı ónimleriniń sawda yarmarkası bolıp ótti.

Bul ilaj “Ózeltexsanaat” associaciyasınıń baslaması menen shólkemlestirilgen bolıp, onda elimizdiń jetekshi óndiris kárxanaları óz ónimlerin kórsetpekte. Áhmiyetlisi, yarmarkada “Made in Uzbekistan” brendi astında usınılıp atırǵan zamanagóy elektrotexnika quralları, turmıslıq texnika úskeneleri hám innovaciyalıq texnologiyalıq sheshimler jergilikli qarıydarlar hám isbilermenlerde úlken qızıǵıwshılıq oyatpaqta.
Yarmarka sheńberinde biznes ushırasıwlar, eki tárepleme sóylesiwler, jańa eksport shártnamalarına qol qoyıw hám perspektivalı birge islesiw joybarların dodalaw ilajları shólkemlestirildi.
“Ózeltexsanaat” associaciyası málimleme xızmetiniń basshısı Namoz Tolipovtıń málim etiwinshe, usı jıl 17-iyun kúni óz jumısın baslaǵan bul yarmarka tek ǵana ónimlerimizdi keń auditoriyaǵa tanıstırıw emes, al olardıń real bazar talaplarına qanshelli sáykes keletuǵının kórsetiw imkaniyatın bermekte.

– Awǵanstan bazarı biz ushın áhmiyetli bolıp esaplanadı. Bul jerdegi sherikler menen tikkeley baylanıslardı jolǵa qoyıw, jergilikli isbilermenler menen isenimli qatnasıqlar ornatıw tiykarǵı maqsetlerimizden biri. Sonday-aq, “Made in Uzbekistan” brendin xalıqaralıq dárejede jáne de abıraylı etiw ushın bunday maydanlar júdá nátiyjeli. Bul yarmarka jergilikli tutınıwshılardıń talap hám mútájliklerin tikkeley úyreniw, eksport potencialın keńeytiw, ónimlerdiń básekige shıdamlılıǵın arttırıw baǵdarında áhmiyetli qádem bolıp esaplanadı. Ilajda qatnasıp atırǵan sırt elli birge islesiwshiler, investorlar hám isbilermenler ushın sóylesiw maydanı, ónimler menen tikkeley tanısıw hám kelisimler dúziw ushın barlıq sharayatlar jaratılǵan, – dedi N.Tolipov.

Nasiba ZIYoDULLAEVA,
ÓzAnıń xabarshısı