Bir neshe jıl aldın Nókis qalasındaǵı Jeke terek mákan puqaralar jıyınında 16 qabatlı 80 kvartiralı 5 imarat boy tiklep, átirapı abadanlastırılıp, jańa infrastruktura jaratılıp, kóplegen shańaraqlar jańa qonısına iye bolǵan edi. Házirgi waqıtta bul jerge olardıń kópshiligi kóship kelip, ortası oynap júrgen balalarǵa tolı qala ishindegi óz aldına kishkene elatqa aylandı.

Jaqında bul jerde, yaǵnıy, eki ay aldın usı imaratlarǵa qosımsha jáne 16 qabatlı 80 kvartiralı 4 imarattıń qurılıs jumısları baslandı.
Házirgi waqıtta olardıń birewiniń beton menen tiklew jumısları tolıq tamamlanıp, diywalın gazobeton menen óriw, sırtın qaplaw jumısları alıp barılıp atırǵan bolsa, jáne bir imarattıń beton menen tiklew jumısları 8 qabatqa shekem jetkerilgen. Taǵı eki imarattıń jeri tayarlanıp, tırnaǵın quyıwǵa tayarlıq jumısları alıp barılmaqta.
– Bizler bul jerde 45 adam bolıp jumıs islep atırmız,-deydi «Dekstroy» ashıq akcionerlik jámiyetiniń is basqarıwshısı S.Orazbaev. – Jámiyetimiz tárepinen 3 imaratta jumıs alıp barılmaqta. Taǵı bir imarattıń jumısları «KKRASI BETON» kárxanası tárepinen islenbekte.
Bul jerdegi qurılısshılar ushın barlıq sharayatlar jaratılǵan. Úsh mezgil ıssı awqat, aylıqları óz waqtında berilip barılmaqta.
Qurılıs jumısların sapalı hám óz waqtında ámelge asırıw ushın barınsha háreket etip atırmız. Qurılıs materialları óz waqtında jetkerilip tursa, qarjılandırıw úziliske túspese, jumıs kólemi belgilengen múddetlerde orınlanadı, álbette.
Házirgi waqıtta imaratlardıń biriniń segizinshi qabatın quyıw ushın opalubkaların taqlap tayarlap atırmız.
Qurılıs jumısları qızǵın dawam etpekte.

Á.Jiyemuratov,
Qaraqalpaqstan xabar agentligi