Ellikqala rayonı prokurorı Sh.Matyakubov hám tiyisli kárxana hám shólkemlerdiń basshıları rayonnıń eń alıs aymaqlarınan biri bolǵan “Shuqırqaq” mákan puqaralar jıyınında boldı, – dep maǵlıwmat beredi rayon hákimligi Málimleme xızmeti bólimi.

Sapar sheńberinde rayon prokurorı tárepinen xalıqtı oylandırıp atırǵan, olardı qıynap kiyatırǵan mashqalalardı úyreniw hám olarǵa sheshim tabıw maqsetinde kóshpeli qabıllaw shólkemlestirildi. Sonıń menen birge, jaslar menen ashıqtan-ashıq sóylesiwler ótkerilip, olardıń usınıs hám baslamaları tıńlandı jáne ámeliy usınıslar tiykarında tiyisli ilajlar belgilep alındı.
Máhállede xalıq ushın sawda yarmarkası shólkemlestirildi. Sonday-aq, ulıwma bilim beriw mektebi, mektepke shekemgi bilimlendiriw mákemesi hám awıllıq shıpakerlik punktiniń jumısı úyrenilip, bar sharayatlar hám mashqalalar boyınsha tiyisli shólkemlerge tapsırmalar berildi. Sol kúni máhálledegi puqaralar medicinalıq tekseriwden ótkerildi.
Sonday-aq, sociallıq qorǵawǵa mútáj, kem támiyinlengen shańaraqlarǵa azıq-awqat ónimleri tarqatılıp, olarǵa materiallıq hám ruwxıy járdem kórsetildi. Bul sapar etiw máhálledegi puqaralar menen tikkeley sóylesiw tiykarında mashqalalardı sheshiwde úlken áhmiyetke iye boladı.

Qaraqalpaqstan xabar agentligi