“Ózagrostar xolding” kompaniyası janındaǵı “Beruniy – Agro Star” JShJ sırt eldegi qánigeler menen birge islesiwdi jolǵa qoymaqta.

“Beruniy – Agro Star” JShJ hám Yaponiyanıń CHiba qalasında jaylasqan CHiba universitetiniń professorı, joqarı kategoriyalı agronom Tagoshi Satoshi menen birgelikte Beruniy rayonındaǵı qıytaq jer iyeleri menen diyqan xojalıqları iyeleriniń qatnasıwında seminar shólkemlestirildi.
Seminar dawamında sharwashılıq ot-jeminde qollanılatuǵın sırt el eginleriniń agrotexnologiyaları haqqında prezentaciya ótkerildi.
Onda Yaponiyanıń Poteto mazalı kartoshka sortınıń agrotexnologiyası hám onı sharwashılıq azıqlıǵında paydalanıw jolları boyınsha óz tájiriybesi menen ortaqlastı.
Seminar juwmaǵında qatnasıwshılarǵa Poteto kartoshka sortınıń nálleri tarqatıldı. Bul sorttı Qaraqalpaqstan sharayatında egiw boyınsha tájiriybe almasıwǵa kelisip alındı.
Bunnan soń professor rayonda egilgen eginlerdi kózden ótkerdi. “Tınıshlıq” APJ aymaǵındaǵı diyqan fermer Xamit Samanov tárepinen egilgen mákkeniń vegetaciya dáwiri menen tanıstı. Mákkege tógin beriw boyınsha óz tájiriybesin úyretip, eginlerde qollanıw boyınsha usınıslar, sonday-aq, zıyankeslerden saqlaw jolları boyınsha óz másláhátin berdi.

Qaraqalpaqstan xabar agentligi