Ózbekstan Respublikası Ministrler Kabinetiniń 2024-jıl 16-fevralda qabıl etilgen “Oraylasqan ishimlik suwı támiynatı jetip barmaǵan awıllıq elatlı punktlerdi ishimlik suw menen támiyinlew hám aqaba suwlardı shıǵarıp jiberiw xızmetlerin kórsetiw boyınsha mámleketlik sociallıq buyırtpalardı beriw tártibi haqqında”ǵı 93-sanlı qararınıń orınlanıwın támiyinlew maqsetinde keń kólemli jumıslar ámelge asırılmaqta.

Usı qarar hám Ministrler Kabineti Prezidiumı májilisiniń 2024-jıl 13-apreldegi 32-sanlı protokolınıń 4-qosımshasınıń 9-bántine muwapıq, Beruniy rayonındaǵı “Biybazar” awıl puqaralar jıyınında jasawshı xalıqtı taza ishimlik suwı menen támiyinlew joybarı ámelge asırılmaqta. Joybar sheńberinde 1 zamanagóy ishimlik suwı obektin qurıw hám 12 km uzınlıqtaǵı suw tarmaqların tartıw belgilengen. Bul aymaqta jámi 271 shańaraq bolıp, 1062 puqara jasaydı.
Joybardıń jumıstı bólip alıp islewshisi – “Bunyodkor Janubiy” suw qurılısı basqarması. Házirgi waqıtqa shekem ulıwma jumıslar kóleminiń 55 procenti orınlandı. Atap aytqanda,
Sanaat zonasında 2 suw qudıǵı qazılıp, transformator úskeneleri hám elektr baǵanaları ornatıldı.
Nasos stanciyası tırnaǵı beton qaplamalar menen bekkemlenip, xalıq jasaytuǵın kóshelerde 11 texnikalıq qudıq hám 24 órt qáwipsizligi gidrantları ornatılıp, jámi 16 941 metr uzınlıqta suw bólistiriwshi qubırlar tartıldı hám kóplegen shańaraqlar suw menen támiyinlendi.
Sonday-aq, Ámiwdárya rayonında jaylasqan “Xolimbeg” awıl puqaralar jıyınında da mámleketlik sociallıq buyırtpa tiykarında joybar ámelge asırılmaqta. Bul jerdegi joybar sheńberinde 1 ishimlik suwı obektin qurıw hám 10 km uzınlıqtaǵı suw tarmaǵın tartıw belgilengen. Aymaqta jámi 350 shańaraqta 1820 xalıq jasaydı.
Bul joybar boyınsha da jumıslar jedel pátlerde alıp barılmaqta. Házirgi waqıtqa shekem 62 procent jumıslar orınlanǵan. Sonnan,
Sanaat zonasında 2 suw qudıǵı qazılıp, xalıq jasaytuǵın kóshelerde 11 texnikalıq qudıq hám 30 órt qáwipsizligi gidrantları ornatıldı.
190 nan aslam shańaraqqa jámi 19 000 metrden aslam ishimlik suwı qubırları tartılıp, sapalı suw támiynatı jolǵa qoyıldı.
Usınday jumıslardıń nátiyjesinde Beruniy hám Ámiwdárya rayonlarındaǵı awıl puqaralar jıyınlarınıń xalqın taza ishimlik suwı menen támiyinlew, sanitariyalıq-epidemiologiyalıq turaqlılıqtı qáliplestiriw, sonday-aq, xalıqtıń turmıs dárejesin arttırıwǵa úlken úles qosılmaqta.

Qaraqalpaqstan xabar agentligi