Qaraqalpaq xalqınıń biytákirar tábiyatı, áyyemgi tariyxı hám bay mádeniyatı haqqında Ózbekstan Respublikası Prezidenti Sh.M.Mirziyoev: «Qaraqalpaq diyarı óziniń dúnyada uqsası joq, qaytalanbas kórkem óneri menen bárshemizdi tań qaldırıp keledi. Ásirese, ata-babalarımızdan qalǵan biybaha folklorlıq shıǵarmaları dıqqatqa ılayıq. Óz jurtı, óz úlkesinde ata-babalarınıń miyrasına hámiyshe sadıqlıq ruwxında jasap atırǵan márt hám miynetkesh qaraqalpaq eliniń bekkem erkine tán berip, bunday xalıq penen hár qanday maqtansań arzıydı», – degen edi.

Sonlıqtan Jurtbasshımız tárepinen sońǵı jılları xalıq xojalıǵınıń barlıq tarawları qatarında, Qaraqalpaqstanda mádeniyat hám kórkem óner tarawın rawajlandırıwǵa da ayrıqsha itibar qaratılıp, ásirge tatırlıq iri ózgeris hám jańalanıwlar júz bermekte.
Ásirese, Prezidentimizdiń tikkeley ǵamqorlıǵınıń arqasında, Nókis qalasında Opera hám baqsıshılıq kórkem ónerine qánigelestirilgen mektep, Ózbekstan mámleketlik Mádeniyat hám kórkem óner institutı Nókis filialı hám Ózbekstan mámleketlik konservatoriyasınıń Nókis filialınıń shólkemlestiriliwi qaraqalpaq xalqınıń áyyemgi mádeniyatı hám kórkem ónerine degen húrmettiń ayqın kórinisi boldı desek asıra aytqan bolmaymız.
-Ózbekstan mámleketlik konservatoriyasınıń Nókis filialı Ózbekstan Respublikası Prezidenti Sh. Mirziyoevtiń 2020-jıl 2-oktyabr kúni Qaraqalpaqstan Respublikasına saparı dawamında Qaraqalpaqstan Respublikası Joqarǵı Keńesiniń gezeksiz segizinshi sessiyasında berilgen tapsırmalar hám keńeytilgen tártipte ótkerilgen 73-májilis protokolınıń orınlanıwın támiyinlew maqsetinde, Ózbekstan Respublikası Ministrler Kabinetiniń 2021-jıl 5-aprel kúngi 186-sanlı qararı tiykarında shólkemlestirildi,-deydi usı filial direktorı Qaraqalpaqstan Respublikasına xızmet kórsetken artist, «Shuhrat» medalınıń iyesi, professor Rudakiy Allambaev.- 2021-jılı filialımızǵa Professional bilimlendiriw baǵdarları boyınsha, kórkem ónertanıw, muzıka tanıw, dirijyorlıq (túrleri boyınsha), vokal kórkem óneri (túrleri boyınsha), sazendeshilik (túrleri boyınsha) tálim baǵdarları boyınsha 47 jas oqıwǵa qabıllanǵan bolsa, 2022-jılı 57 student, 2024-jılı 61 student, 2025-jılı 71 student qabıllandı. Házirgi waqıtta filialımızda 229 student 65 professor-oqıtıwshılardan zaman talabına say tálim-tárbiya almaqta.
Biraq, tilekke qarsı, usı jıllar ishinde filialımız óz aldına oqıw imaratına iye emes edi. Sonlıqtan dáslepki jılları filialımız professor-oqıtıwshıları ózleriniń sabaqların Nókis qánigelestirilgen mádeniyat mektebinde ótiwge májbúr boldı.
Húrmetli Prezidentimiz Sh.Mirziyoevtiń arnawlı qararı tiykarında, ótken jılı Ózbekstan mámleketlik konservatoriyasınıń Nókis filialınıń oqıw imaratı ushın Nókis qalasınıń Baǵshılıq mákan puqaralar jıyını aymaǵınan arnawlı jer ornı ajıratılıp, ulıwma bahası 26mlrd sum bolǵan qurılıs jumısları baslandı.
-Qurılıstı ótken jılı avgust ayında baslaǵan edik,-deydi «Twproq qala maxsus qurilish» juwapkershiligi sheklengen jámiyetiniń injeneri Jasur Yusupov.-Búgingi kúnge shekem qurılıs ońlaw jumıslarınıń 80 procentin juwmaqladıq. Nesip etse, avgust ayınıń basına qurılıs jumısların tolıq juwmaqlap, oqıw imaratın xalıq iygiligi ushın paydalanıwǵa tapsıramız. Bul jumıslardı tez arada, sapalı juwmaqlaw ushın jámiyetimiz aǵzaları ayanbastan xızmet ete beredi.
Haqıyqatında da, xalqımızdıń kórkem óner hám mádeniyatqa degen ıqlası hám húrmeti oǵada joqarı. Sonlıqtan házirgi kúnleri jámiyet qurılısshıları Prezidentimizdiń jas áwladlarımızǵa islep atırǵan ǵamqorlıǵın ámelde kórsetiw maqsetinde, waqıt penen sanaspastan xızmet etpekte. Bul álbette, elimizde Prezidentimiz basshılıǵında júrgizilip atırǵan iri reformalardıń ayqın bir kórinisi bolıp tabıladı.

Adilbay Orazov,
Qaraqalpaqstan xabar agentligi sholıwshısı.