Sońǵı jıllarda respublikamızda kóplegen iri qurılıs, ońlaw jumısları ámelge asırılıp, qala hám rayonlardıń kelbeti pútkilley jańa túrge enbekte. Ásirese, úlken gúzar kóshelerdiń boylarında kóp qabatlı imaratlar boy tiklep, abadanlasıp qalalarımızdıń kórkine-kórik qospaqta.

Jaqında Nókis qalasındaǵı 26-kishi rayonda da 285 kvartiralı 5 kóp qabatlı turaq jaylardıń qurılıs jumısları baslandı. Házirgi waqıtta bir imarattıń qurılıs jumısları alıp barılatuǵın jer ornı tayarlanıp, tırnaǵın quyıwǵa tayarlıq jumısları alıp barılmaqta. Onıń janınan jáne bir imarattıń qurılısı ushın jerdi tayarlaw jumısları ámelge asırılmaqta.
Búgingi kúnge shekem Ózbekstan Respublikası Ministrler Kabinetiniń 2024-jıl 11-oktyabr kungi 665-sanlı qararına muwapıq Nókis qalasındaǵı Jeke terek MPJ aymaǵındaǵı joldıń 2 kilometrlik aralıǵına ЩPS (qum-shaǵıl tas aralaspası) qaplaması tóseldi.
– Qala aymaǵında infrastrukturanı, xalıqtıń abadanlıǵın arttırıw maqsetinde tiyisli qararǵa tiykarlanıp, “Jáhán banki”niń joybarı boyınsha 14 dana aqaba suw nasos stanciyası obektlerin hám uzunlıǵı 106 kilometrlik oraylıq aqaba suw tarmaqların rekonstrukciyalaw, 6 dana aqaba suw nasos stanciyaların hám joybar boyınsha quwatlılıǵı 63 000 m3/sutka. bolǵan 1 dana aqaba suw tazalaw tarmıǵı (KOS) obektin, sonday-aq uzınlıǵı 106 kilometrlik oraylıq suw tarmaqların jańadan qurıw rejelestirilgen,-deydi Nókis qalası hákimliginiń qurılıs, kommunikaciyalar, kommunal xojalıǵı, ekologiya hám kóklemzarlastırıw máseleleri boyınsha qánigesi Sultan Kengesbaev.
Házirgi waqıtta “POSCH & PARTNERS CONSULTING ENGINEERS,” “FORLOG AG” JShJ, “Water Engineering-Pro” xalıqaralıq joybarlaw institutları hám konsultantları tárepinen joybar-smeta hújjetleri islep shıǵılmaqta.
Búgingi kúnge shekem Ózbekstan Respublikası Prezidentiniń 2024-jıl 23-sentyabr kúngi arnawlı qararına muwapıq, Nókis qalası aymaǵındaǵı 8 awır máhállede (Isbilermenler aymaǵı, Samanbay, Jasıl baǵ, Ata mákan, Qutlı mákan, Shımbay guzarı, Bes tóbe, Teleoray MPJları) ulıwma bahası 23,6 mlrd. sumlıq
qurılıs-abadanlastırıw jumısları alıp barıldı.
Bıyılǵı jıl dawamında Ivesticiyalıq baǵdarlama sheńberinde 9 sociallıq hám infrastrukturalıq obektlerde jámi 188 mlrd. 264 mln. sumlıq qurılıs-ońlaw jumısları ámelge asırılmaqta.
Atap aytqanda, Shadlı awıl MPJ aymaǵındaǵı 43-sanlı mektepke qosımsha 240 orınǵa iye imaratınıń qurılıs jumısları, “Turan” stadionın rekonstrukciyalaw jumısları, 4R176 Nókis-Shımbay-Taxtakópir avtomobil jolınıń 9,3-14,3 kilometrlik bólegin rekonstrukciyalaw, 4R174 Nókis-Xojeli avtomobil jolınıń 0-11 kilometrlik bólegin rekonstrukciyalaw, Kók ózek MPJ aymaǵında oraylasqan ıssılıq qazanxanasın jańadan qurıw, Ózbekstan mámleketlik konservatoriyasınıń Nɵkis filialı imaratın jańadan qurıw, “Nɵkis” suw tazalaw (VOS) obekti boyınsha qurılıs jumısları dawam ettirilmekte.
Qalǵan sociallıq obektlerden, Qumbız awıl MPJ aymaǵındaǵı 26-sanlı mektepke qosımsha 330 orınlıq imaratın jańadan qurıw, Respublika qánigelestirilgen onkologiya hám medicinalıq radiologiya ilmiy ámeliy medicina orayı Qaraqalpaqstan filialı imaratın jańadan qurıw jumısları alıp barılmaqta.
Kóp qabatlı turaq jaylardaǵı qurılıs jumıslarınıń barısı, rejesi, qanshası pitkeni tuwralı aytatuǵın bolsaq, qalamızda turaq jayǵa mútáj puqaralardı turaq jaylar menen támiyinlew boyınsha ótken jılı bir qatar kólemli jumıslar ámelge asırıldı.
Atap aytqanda, qalamızda boy tiklep atırǵan jámi 2951 kvartiralı 56 kóp qabatlı turaq jaylardan, 1326 kvartiraǵa iye 25 kóp qabatlı turaq jaylar tolıq juwmaqlanıp, óz iyelerine tapsırıldı. Qalǵan 1625 kvartiralı 31 kóp qabatlı turaq jaylardı usı jılı pitkerip, tapsırıw rejelestirilgen.
Bul baǵdardaǵı jumıslar nátiyjeli dawam etpekte.

Á.Jiyemuratov,
Qaraqalpaqstan xabar agentligi.