Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń májilisinde “Sırtqı miynet migraciyası haqqında”ǵı nızam dodalandı.

Nızam Ózbekstan puqaralarınıń sırt elde waqıtsha miynet etiwin ámelge asırıwı hám sırt el puqaralarınıń mámlekette miynet etiwin ámelge asırıw menen baylanıslı huqıqıy qatnasıqlardı tártipke salıwǵa qaratılǵan.
Keyingi jılları mámleketimizde alıp barılǵan hákimshilik reformalar nátiyjesinde usı tarawdı basqarıw sistemasında bir qatar ózgerisler ámelge asırılatuǵının atap ótiw kerek.
Sonıń ishinde, Sırtqı miynet migraciyası agentligi saplastırılıp, onıń barlıq wazıypaları hám huqıqıy minnetlemeleri Ministrler Kabineti janında shólkemlestirilgen Migraciya agentligine ótkerilgeni nızam normaların qayta kórip shıǵıwdı talap etti.
Dodalaw dawamında nızamnıń bir qansha statyalarındaǵı wákillikler, monitoring sistemaları, puqaralardı watanǵa qaytarıw mexanizmi hám miynet etriwine ruxsat etiw tártibindegi huqıqıy qarama-qarsılıqlar jáne muwapıqsızlıq jaǵdaylarına ayrıqsha itibar qaratıldı.
Senatorlar tárepinen nızamnıń ayırım normaları búgingi kúndegi reformalar nátiyjesinde óz áhmiyetin joyıtqanı sebepli “Sırtqı miynet migraciyası haqqında”ǵı nızamnıń mámleketlik uyımlar, sonıń ishinde, arnawlı wákillikli uyımǵa baylanıslı statyaların qayta kórip shıǵıw hám jetilistiriw zárúr ekenligi atap ótildi.
Senatorlar, xalıq deputatları jergilikli keńesleriniń turaqlı komissiyalarınıń aǵzaları, Kámbaǵallıqtı qısqartıw hám bántlik ministrliginiń wákilleri, Migraciya agentliginiń qánigeleri, ekspertler hám ǵalaba xabar qurallarınıń xızmetkerleri qatnasqan májilis juwmaǵında tiyisli qarar qabıl etildi.

Norgul ABDURAIMOVA,
ÓzA xabarshısı