Qaraqalpaqstan Respublikası Nókis qalasında “Ózsanaatqurılısbank”tiń baslaması menen “Startap hám investorlar kúni” ilajı ótkerildi. Onda jergilikli hám sırt el venchur fondları, akseleratorlar, investorlar, ǵalaba xabar qurallarınıń wákilleri hám belsendi jaslardan ibarat 150 ge shamalas qatnasıwshı qatnastı.

Búgingi kúnde startaplar hám investorlardı bir platformada birlestiriw ideyası global ekonomikada ózin aqlap atırǵan nátiyjeli kózqaraslardan biri bolıp esaplanadı. Prezidentimizdiń 2024-jıl 20-dekabrdegi PP-223-sanlı pármanında belgilengen tiykarǵı wazıypalar, atap aytqanda, aymaqlarda ekonomikalıq ósiwdi xoshametlew, xalıqtıń bántligin arttırıw hám juwapker shólkemlerdiń juwapkershiligin kúsheytiw – usı forum arqalı ámelde óz kórinisin taptı.
“Startap hám investorlar kúni” perspektivalı, innovaciyalıq hám básekige shıdamlı joybarlardı anıqlaw, olardı qollap-quwatlaw hám turmısqa engiziw ushın qolaylı maydan bolıp xızmet etti. Sonıń menen birge, ilaj “SQB Ventures” investiciyalıq kompaniyasınıń jumısı sheńberindegi dáslepki ámeliy qádemlerden biri sıpatında da ayrıqsha áhmiyetke iye boldı.
Ilajda “SQB Ventures” penen bir qatarda startap ekosistemasına tiyisli jetekshi jergilikli hám sırt el kompaniyaları – “Aloqa Ventures”, “UC Ventures”, “Startup Garage”, “UzVS, “Sturgeon Capital” (Ullı Britaniya), “IT Park Ventures”, “Plug and Play” (AQSh) jáne Nókis hám Tashkent qalasındaǵı startap joybarlarınıń iyeleri qatnastı.
Forum sheńberinde jas isbilermenler óz startap ideyalarınıń prezentaciyasın ótkerdi, olardı investorlardıń pikir-usınısları tiykarında jetilistiriwge kiristi.
Startap baǵdarında tájiriybege iye qánigelerdiń qatnasıwında ashıq sóylesiwler, investiciya tartıw boyınsha isenimli strategiyalardı dodalawlar hám minimal paydalı ónim (MVP) jaratıwǵa baǵıshlanǵan sheberlik sabaqları shólkemlestirildi.
Pitch-sessiyaları tartıslı, soraw-juwaplarǵa bay ótti, qatnasıwshılar qánigelerden ámeliy usınıslar aldı. Rásmiy emes sóylesiwler (“netvorking”) waqtında óz-ara tájiriybe almasıp, perspektivalı birge islesiwdi ornatıw imkaniyatına iye boldı.
Sonıń menen birge, Ózsanaatqurılısbank tárepinen aymaqlıq ekonomikalıq potencialdı arttırıw, qarjılay turaqlılıqtı támiyinlew hám innovaciyalıq baǵdarlardı qollap-quwatlaw baǵdarında ámelge asırılıp atırǵan jumıslar haqqında da maǵlıwmat berildi. Onda banktiń ekologiyalıq turaqlılıq hám sanlı texnologiyalarǵa tiykarlanǵan investiciyalıq siyasatı qatnasıwshılarda úlken qızıǵıwshılıq oyattı.
Forum sheńberinde rásmiy túrde akseleraciya baǵdarlamasına start berildi.
Ilaj juwmaǵında bolsa, qatnasıwshılardıń pikir-usınısları tiykarında bir qatar usınıslar islep shıǵıldı. Atap aytqanda, bunday ilajlardı mámlekettiń basqa aymaqlarında da shólkemlestiriw, akseleratorlar hám venchur fondlar menen birge islesiwdi tereńlestiriw, Nókis jasları ushın jańa startap baǵdarlamaların islep shıǵıw hám mánzilli qollap-quwatlaw, kúndelikli ushırasıwlar hám monitoring sistemasın engiziw arqalı bul qatnasıqlardıń nátiyjeliligin arttırıw názerde tutıldı.
Ulıwma, “Startap hám investorlar kúni” tek ǵana Qaraqalpaqstanda emes, al barlıq aymaqlarda innovaciyalıq ortalıqtı rawajlandırıwǵa xızmet etetuǵını atap ótildi.

ÓzA