Ázerbayjannıń Baku qalasında “Nızam ústinligin bekkemlew: Ombudsmanlar hám insan huqıqları boyınsha milliy institutlardıń ornı” temasında xalıqaralıq simpozium bolıp ótti.

Ázerbayjan Respublikası Insan huqıqları boyınsha wákili (Ombudsman) hám bir qatar shólkemler menen birgelikte shólkemlestirilgen bul abıraylı ánjumanǵa 20 dan aslam mámleketten Ombudsmanlar hám insan huqıqları boyınsha milliy institutlardıń basshıları qatnastı.
Ilajǵa Milliy insan huqıqları institutları global alyansı (GANHRI), Milliy insan huqıqları institutlarınıń Evropa tarmaǵı (ENNHRI), Islam birge islesiw shólkemi Ombudsmanlar associaciyası (OIC Ombudsman Association) hám basqa da xalıqaralıq shólkemlerdiń wákilleri de qatnastı.
Sessiyada shıǵıp sóylegen Ózbekstan Ombudsmanı Feruza Eshmatova mámleketimizde insan huqıqların támiyinlewge qaratılǵan reformalar haqqında aytıp ótti. Ol, sonıń ishinde, jańa redakciyada qabıl etilgen Konstituciyada insan qádiri, abırayı hám erkinliklerin kepillewge baylanıslı huqıqıy tiykarlar jáne de bekkemlengenin atap ótti.
2024-jılı qabıl etilgen “Ózbekstan Respublikası Oliy Majlisiniń Insan huqıqları boyınsha wákili (Ombudsman) haqqında”ǵı nızam jańa Konstituciya normalarına muwapıqlastırıldı.
Ombudsman institutınıń insan huqıqları boyınsha milliy institut sıpatındaǵı áhmiyeti arttırılıp, huqıqları keńeytildi. Orınlarda huqıqıy járdem hám jámiyetshilik penen pikirlesiwdi támiyinlewshi “Ombudsman mektebi” hám “Ombudsman saatları” hám mayıplıǵı bolǵan balalar hám Mehriybanlıq úyleri tárbiyalanıwshıları arasında ótkerilip kiyatırǵan “Huqıq bilimdanı” Ombudsman viktorinası ilaj qatnasıwshılarında úlken qızıǵıwshılıq oyattı.
Ánjuman sheńberinde Ombudsmanlar arasında tájiriybe almasıldı. Insan huqıqların támiyinlewdiń zamanagóy mexanizmlerin dodalaw, sonıń ishinde, sanlastırıw hám jasalma intellekt dáwirinde insan huqıqların qorǵaw, kelispewshilikler aqıbetinde jábirlengen xalıqqa huqıqıy járdem kórsetiw sıyaqlı áhmiyetli máselelerge ayrıqsha itibar qaratıldı.
F.Eshmatova simpozium sheńberinde bir qatar mámleketlerdiń Ombudsmanları menen eki tárepleme ushırasıwlar ótkerip, insan huqıqları tarawındaǵı óz-ara tájiriybe hám birge islesiw baylanısların jáne de rawajlandırıw máselelerin dodaladı.

N.Abduraimova, ÓzA