Usı jıldıń 17-iyun kúni Qırǵızstan mádeniyat, málimleme hám jaslar siyasatı ministri Mirbek Mambetaliev Bishkek qalasında Ózbekstan elshisi Saidikram Niyozxwjaev penen ushırasıw ótkerdi, dep xabar bermekte “Kabar” málimleme agentligi.

Óz-ara sóylesiw waqtında tárepler qırǵız-ózbek mádeniy birge islesiwin bunnan bılay da keńeytiw, birgeliktegi mádeniy baǵdarlamalardı ámelge asırıwǵa ayrıqsha itibar qaratıw, sonday-aq, dóretiwshilik toparlardıń óz-ara birge islesiwi hám jaslar joybarların rawajlandırıw máselelerin hár tárepleme dodaladı.
Mirbek Mambetaliev eki mámleket xalıqları arasındaǵı tuwısqanlıq baylanısları hám óz-ara awızbirshilikti bekkemlewde mádeniy sóylesiw áhmiyetli orın iyeleytuǵının ayrıqsha atap ótti.
– Mádeniyat – xalıqlardı birlestiretuǵın kópir. Biz birge islesiwimizdi jáne de nátiyjeli hám kóp tárepleme etiwge umtılamız, – dedi ministr.
Óz gezeginde, elshi Saidikram Niyozxwjaev shın júrekten qabıllaǵanı ushın minnetdarshılıq bildirip, Ózbekstan hám Qırǵızstan arasındaǵı mádeniy baylanıslardıń áhmiyetin atap ótti hám bir qatar perspektivalı baslamalardı alǵa qoydı.
Eki elde mádeniyat kúnleri turaqlı ótkerilip kiyatırǵanı óz-ara tájiriybe almasıw hám milliy kórkem ónerimizdi ǵalaba en jaydırıwǵa xızmet etip atırǵanın atap ótiw kerek. Ásirese, jaqın qońsıshılıq qatnasıqların bekkemlew hám akademiyalıq almasıwdı rawajlandırıwǵa qaratılǵan jaslar joybarlarına ayrıqsha itibar qaratılmaqta.
Ushırasıw juwmaǵında tárepler tıǵız birge islesiwdi dawam ettiriw hám mádeniy baylanıslardı jáne de bekkemlew jáne tájiriybe almasıwǵa qaratılǵan jańa birgeliktegi joybarlardı ámelge asırıw boyınsha anıq rejeler islep shıǵıwǵa kelisip aldı.

S.Rahimov, ÓzAnıń xabarshısı