Shanxay Birge islesiw Shólkemine aǵza mámleketlerde sanlı texnologiyalar tarawındaǵı birge islesiw búgingi kúnde regionallıq turaqlılıq hám ekonomikalıq rawajlanıwdıń áhmiyetli faktorı sıpatında tán alınbaqta.

ShBSh sheńberindegi bul birge islesiw málimleme-kommunikaciya texnologiyaların rawajlandırıw, sanlı qáwipsizlik, IT bilimlendiriw hám kadrlar tayarlaw baǵdarların qamtıp alǵan.
Tárepler sanlı tarawdaǵı qánigelerdi tayarlaw, tájiriybe almasıw hám ShBSh sheńberindegi universitetler arasında birge islesiwdi kúsheytiw boyınsha kelisimlerge erispekte.
Qıtayda Shanxay Birge islesiw Shólkemine aǵza mámleketlerdiń qatnasıwında sanlı texnologiyalar tarawındaǵı birge islesiwge baǵıshlanǵan forumnıń ashılıw máresiminde sanlı texnologiyalar ministri Sherzod Shermatov shıǵıp sóyledi.
Ministr sanlı transformaciya processleri, málimleme texnologiyaları hám innovaciyalardı engiziw arqalı ShBSh mámleketleri arasındaǵı birge islesiwdi kúsheytiw zárúr ekenligin atap ótti. Sonday-aq, ol Ózbekstanda sanlı ekonomikanı rawajlandırıw, sanlı infrastrukturanı keńeytiw hám sanlı xızmetlerden paydalanıw dárejesin arttırıw boyınsha ámelge asırılıp atırǵan jumıslar haqqında maǵlıwmat berdi.
Ilaj sheńberinde qatnasıwshı mámleketlerdiń wákilleri sanlı texnologiyalar baǵdarında tájiriybe almasıw, qáwipsizlikti támiyinlew, jasalma intellekt hám basqa da sanlı sheshimlerdi ámeliyatqa engiziw baǵdarındaǵı birge islesiw máselelerin dodaladı.
Sonday-aq, ministr ilaj qatnasıwshıların usı jıldıń 23-26-sentyabr kúnleri mámleketimizde bolıp ótetuǵın “ICTWeek – 2025” hápteligine mirát etti.

Nigora RAHMONOVA,
ÓzA xabarshısı