Respublikamızdıń ǵawasha maydanlarında ushırasatuǵın qáwipli zıyankesler (shire, trips, ǵórek qurtı, órmekshi kene, qandala hám basqalar), kesellikler hám jabayı shóplerge qarsı gúresiw ilajlarınıń shólkemleskenlik penen ámelge asırılıwın, olardıń sapalı orınlanıwın qadaǵalawdı támiyinlew maqsetinde 2025-jıldıń 16-iyun sánesinen 25-iyul sánesine shekem “Áhmiyetli 40 kúnlik” járiyalanadı.

Agroklasterler, fermer, diyqan xojalıqları ǵawasha maydanlarında monitoring jumısları alıp barıladı. “Áhmiyetli 40 kúnlik” ilajları rejesine tiykarlanıp rayon hákimlikleri menen birgelikte ǵawasha maydanlarında ushırasatuǵın zıyanlı organizmlerdiń payda bolıwı, kóbeyiwi hám tarqalıwına qarsı nátiyjeli gúresiw boyınsha ilajlar ótkerilip, olardıń ámelge asırılıwı da qadaǵalanadı.
Sonday-aq, ǵawasha maydanlarında biologiyalıq qorǵaw quralların mólsherinde qollanıw ilajları kóriledi. Zıyankeslerdiń ekonomikalıq zıyan muǵdarı normasınan (EZMN) artıp ketiwi baqlansa ximiyalıq qayta islew usınıs etiledi.
Ǵawashanıń tiykarǵı zıyankesleri (shire, trips, ǵórek qurtı, órmekshi kene hám qandala) anıqlanǵanda jedellik penen Karantin agentliginiń elektron platformaları arqalı xabarnama jiberilip, fitosanitar talaplardı óz waqtında orınlamaǵan jer iyelerine nızamda belgilengen tártipte sharalar kóriledi.
Sırt el ǵawasha sortlarınıń fitosanitariyalıq jaǵdayı da ayrıqsha qadaǵalaw astında bolıp, atız maydanlarınan alınǵan úlgiler Oraylıq hám aymaqlıq fitosanitariyalıq laboratoriyalarda tekserip barıladı.
Ǵawasha atızlarında zıyankesler anıqlanǵanda, karantin inspektorlarına xabarlasıw usınıs etiledi. Bul ushın “Agrokwmakchi” mobil qosımshasınıń “inspektordı shaqırıw” túymesinen paydalanıp, biypul usınıs hám kórsetpeler alıwǵa da boladı.

Qaraqalpaqstan xabar agentligi