Ámiwdárya rayonındaǵı qábiletli hám belsendi jaslar ushın jazǵı dem alıstı mazmunlı hám nátiyjeli ótkeriw maqsetinde arnawlı dem alıw imkaniyatları jaratılmaqta. Rayondaǵı bir topar jaslar, Tórtkúl hám Ellikqala rayonlarındaǵı dem alıw orınlarına jiberildi.

Olardı shıǵarıp salıw máresimine Ámiwdárya rayonı hákimi S.Xojametov, rayon prokurorı B.Masharipov hám rayonlıq ishki isler bólimi baslıǵı M.Xojamuratov qatnastı. Olar jaslarǵa qızǵın tilekler bildirdi, – dep maǵlıwmat beredi rayon hákimligi Málimleme xızmeti bólimi.
Bul jaslar arasında ayrıqsha bahalarga oqıǵan oqıwshılar, belsendi sportshılar hám sociallıq joybarlarda qatnasqan jas jetekshiler bolıp, hár biri óz tarawında joqarı nátiyjelerge erisken. Olar bul dem alıw imkaniyatı arqalı tek ǵana jańa tájiriybelerge iye bolıp qalmastan, al ózleriniń jeke ósiwlerine de úlken járdem aladı.
Bul baslama jaslardıń tek ǵana dem alıwına xızmet etip qoymastan, olardıń jámiyetlik belsendiligin, jámiyettegi rolin de jańa basqıshqa kóteredi. Sonıń ishinde, jaslar ushın shólkemlestirilgen dem alıw orayları, olarǵa sociallıq baylanıslardı bekkemlew, sportqa bolǵan qızıǵıwshılıqtı arttırıw hám keleshektegi kásiplik tańlawdı anıqlawǵa járdem beredi.

Qaraqalpaqstan xabar agentligi