Sońǵı jılları mámleketimizdiń Qıtay Xalıq Respublikası menen sawda-ekonomikalıq hám qarjı-investiciyalıq birge islesiwi jedel rawajlanbaqta. 2024-jılı tovar almasıw 14 milliard dollarǵa jetti. Investiciyalıq joybarlar portfeli 60 milliard dollardan aslamdı quramaqta.

Mámleketimiz aymaqlarında birgeliktegi texnoparkler hám arnawlı industriallıq zonalar tabıslı jumıs alıp barmaqta, “BYD” elektromobillerin islep shıǵarıw keńeymekte.
“Jasıl” energetika, neft-gaz, ximiya, farmacevtika, metallurgiya, taw-kán, toqımashılıq, azıq-awqat hám qurılıs tarmaqlarında sonday-aq, logistika, “aqıllı” awıl xojalıǵı, jasalma intellekt hám sanlastırıw tarawlarında perspektivalı joybarlar islep shıǵılmaqta.
Shımbay rayon hákimi Aybek Tajetdinov Qıtay Xalıq Respublikasınıń “PEI FU YANG” kompaniyası wákillerinen ibarat isbilermenler delegaciyası menen ushırasıw ótkerdi.
Ushırasıw dawamında Aybek Tajetdinov rayon aymaǵında ámelge asırılıwı rejelestirilip atırǵan birgeliktegi investiciyalıq joybarlar boyınsha sóylesiwler júrgizdi.
Óz gezeginde, qıtaylı delegaciya aǵzaları rayon aymaǵındaǵı jer maydanları hám bar infrastruktura menen tikkeley tanısıw maqsetinde orınlarǵa shıǵıp, ózleriniń qosımsha pikir-usınısların bildirdi.

Adilbay Orazov,
Qaraqalpaqstan xabar agentligi sholıwshısı.