Nókis qalasında «Jańa Ózbekstan – Olimpiada shoqqıları» sport jarıslarınıń dzyudo túri boyınsha aymaqlıq basqıshı bolıp ótti.

Jarısqa Nókis qalası, Ámiwdárya, Taqıyatas, Xojeli hám Nókis rayonlarınan sportshı jaslar qatnasıp, 8 salmaq kategoriyaları boyınsha óz-ara bellesti.
Keskin bellesiwlerge tolı ótken jarıs juwmaǵında, jigitler arasında 50 kg salmaqta Xojeli rayonınan Javohir Shamuratov, 55 kg da Nókis rayonınan Zuhratdin Qurbanbaevlar birinshi orındı iyelegen bolsa, 60-66 hám 81 kg salmaqta ámiwdáryalı palwanlardan Samandar Azatov, Batır Qudaybergenov hám Akbar Jabbarbergenovlar jeńimpazlıqtı qolǵa kirgizdi.
73 hám +90 kg salmaqta nókisli Sultanbek Abatbaev penen Marsel Muratbaev, 90 kg da jáne bir aqmańǵıtlı palwan Islam Orınbaevlar jarıstıń altın medalların jeńip aldı.
Al, qızlar arasında ótkerilgen bellesiwlerde Nókis rayonınan kelgen palwanlar birinshi orındı iyelewge miyasar boldı. Atap aytqanda, 40 kg salmaqta Ulmira Bekmuratova, 44 kg da Ferida Berdimuratova, 48 kg da Ayjamal Erjanova, 52 kg da Shaxnoza Baltanova, 57 kg da Nuray Xalilaevalar bas sıylıqtı jeńip aldı. 63 hám +70 kg salmaq kategoriyalarında bolsa, xojelishi jaslardan Dilnura Zaripbaeva menen Húrziya Orazbaeva, 70 kg da Zumrad Jumamuratovalar bas sıylıq iyelerine aylandı. Ótkerilgen jarıs sońında jeńimpazlar Qaraqalpaqstan Respublikası basqıshına jollama alıp, olarǵa diplom hám medallar tapsırıldı.

Adilbay Orazov,
Qaraqalpaqstan xabar agentligi sholıwshısı