30-iyun – Jaslar kúni múnásibeti menen Ózbekstan Liberal-demokratiyalıq partiyası Qaraqalpaqstan Respublikası Keńesiniń “Jaslar máselelerin úyreniw hám biznesti qollap-quwatlaw” bóliminiń baslaması menen “Milliy ruwx, ilimiy miyras, kino kórkem ónerinde jámlengen” atamasında jaslar hám kino dóretiwshileriniń qatnasıwında ushırasıw shólkemlestirildi.

Ilajda “Qaraqalpaq kinofilm”niń kórkemlik jaqtan basshısı Qudrat Atajanov, Zulfiya atındaǵı mámleketlik sıylıqtıń laureatı Erkinay Orınbaeva, kino tarawına qızıǵıwshı jaslar hám partiyanıń jaslar qanatınıń belsendileri qatnastı.
Ushırasıwda jaslarǵa “Ózbekstan – 2030” strategiyası hám onıń jaslar mánawiyatı, mádeniyatı hám dóretiwshiligin rawajlandırıwdaǵı áhmiyeti haqqında túsinikler berildi. Sonıń ishinde, 2024-2030-jıllar dawamında mámleketshilik rawajlanıwınıń 3000 jıllıq tariyxın sáwlelendiretuǵın 50 kórkem film, 10 milliy qaharmanlarǵa baǵıshlanǵan animaciyalıq film hám serial, sonday-aq, xalıqaralıq kinofestival hám telekanallarda kórsetiwge mólsherlengen joybarlar jaratıw rejeleri haqqında maǵlıwmat berildi.
Májiliste jas kino dóretiwshilerimiz bunday sharayatlardan nátiyjeli paydalanıp, xalqımız, ásirese, jaslarımızdı ǵárezsizlik ideyaları ruwxında tárbiyalawǵa járdemlesetuǵın, bay tariyxımız, ullı ata-babalarımızdıń teńsiz mártligi, zamanlaslarımızdıń pidákerlik miynetin sáwlelendiretuǵın filmler kóriw haqqındaǵı arzıw-niyetlerin ámelge asırıw jolında bar kúsh hám imkaniyatların iske qosıwı zárúrligi atap ótildi.
– Biz mámleketimiz Ózbekstannıń atın pútkil dúnyaǵa tanıtpaqshı ekenbiz, bul jumıstı birinshi gezekte kino kórkem óneri járdeminde ámelge asırıwımız kerek. Áyne, kino kórkem óneri arqalı dúnya ekranların iyelewimiz, usı jol menen jer júzi xalqınıń dıqqat-itibarın tartıwımız múmkin. Bunıń ushın bárshemiz bar kúsh hám imkaniyatlardı, dóretiwshilik potencialdı iske qosıwımız kerek,-deydi “Qaraqalpaq kinofilm” niń kórkemlik jaqtan basshısı Qudrat Atajanov.
Ushırasıw “Scenariyden ekranǵa shekem” temasındaǵı sheberlik sabaǵı menen dawam etti. Onda kinonı súwretke alıw procesi, scenariy jazıw usılı, qısqa metrajlı hám hújjetli filmler jaratıw, kinofestivallarda qatnasıw imkaniyatları haqqında jaslarǵa hár tárepleme másláhátler berildi.
Ushırasıw sońında belsene qatnasqan jaslarǵa estelik sawǵaları tapsırıldı hám jas dóretiwshilerdiń shıǵıwları ilajǵa ayrıqsha keypiyat baǵıshladı.

Qaraqalpaqstan xabar agentligi