Ózbekstan Respublikası Shańaraq hám hayal-qızlar komiteti tárepinen mámleketlik uyımlar, kárxana, shólkem hám mákemelerdegi másláhát-keńes uyımlarınıń wákilleri ushın oqıw-seminar shólkemlestirildi.

Ózbekstan Respublikası Ekonomika hám qarjı ministrligi janındaǵı Bajıxana komitetiniń májilisler zalında bolıp ótken ilajda hayal-qızlardıń gender teńligi máseleleri dodalaw teması boldı.
Videokonferenciya tárizinde ótkerilgen seminarda Bas ministrdiń orınbasarı – Shańaraq hám hayal-qızlar komitetiniń baslıǵı Z.Mahkamova, Bajıxana komitetiniń baslıǵı A.Mavlonov, respublikanıń barlıq ministrlikleri hám uyımları jáne shólkemlerinde jumıs alıp barıp atırǵan másláhát-keńes uyımlarınıń juwapkerleri jáne komitettiń jeke quramı qatnastı.
Ilajda shıǵıp sóylegen Bas ministrdiń orınbasarı Z.Mahkamova hár bir miynet jámáátinde hayal-qızlar hám er adamlar ushın teń huqıqlar menen imkaniyatlardı jaratıw, olardıń miynet huqıqların qorǵaw, miynetine múnásip haqı tólew, xoshametlew, basshılıq lawazımlarına usınıw, jınısı boyınsha tikkeley yamasa nadurıs kemsitiwdi saplastırıwda járdemlesiw hár bir mámleketlik uyımdaǵı másláhát-keńes uyımları jumısınıń tiykarǵı maqseti ekenin atap ótti.
Usı kúnge shekem uyım hám shólkemlerdiń sistemalı shólkemlerinde 155 másláhát-keńes jumısı jolǵa qoyılǵan.
Mámleketimizdiń gender teńlik tarawında erisken jetiskenlikleri xalıqaralıq dárejede de múnásip tán alınbaqta. Sonıń ishinde, Ózbekstan 2024-jılı gender teńlik hám basqarıw indeksi boyınsha 72,8 ball toplap, 103-orınnan 51-orınǵa joqarı kóterilip, 52-orındı iyelewge eristi. Bul indeks 158 mámleketti qamtıp alıp, gender teńlikke erisiw jolında jetiskenlik hám kemshiliklerdi anıqlaw imkaniyatın beredi.
Ózbekstannıń bul jetiskenliklerine tiykar bolǵan áhmiyetli reformalar hayal-qızlardı IT hám STEM tarawlarına jedel tartıw, qızlar ushın sanlı kónlikpeler boyınsha bilimlendiriw baǵdarlamalarınıń iske qosılıwı, hayal-qızlardıń huqıqların qorǵaw hám gender teńlikti támiyinlew boyınsha ámelge asırılǵan ilajlar bolıp esaplanadı.
Seminarda qánigeler tárepinen «Genderge baǵdarlanǵan byudjetlestiriwdi engiziwdiń perspektivaları,» «Másláhát keńes-organları: tájiriybe hám ámeliyat», «Genderge baylanıslı auditti ótkeriw nátiyjeleri hám juwmaqları», «Genderge baylanıslı xalıqaralıq reyting hám indekslerde Ózbekstannıń ornın jaqsılawǵa qaratılǵan ilajlar» temalarında bayanatlar jasaldı.

Nilufar BOZOROVA, ÓzAnıń xabarshısı