Nókis qalasında ulıwma orta bilim beriw mektepleri oqıwshılarınıń jazǵı dem alıs dáwirindegi bos waqtın mazmunlı ótkeriw, olardı sportqa keńnen tartıw maqsetinde, «Yoshlik sport komandaları» sport jarıslarınıń gandbol túri boyınsha respublikalıq basqıshı bolıp ótti.

Jarısqa mámleketimizdiń barlıq aymaqlarınan eń kúshli komandalar qatnastı.
Qızıqlı hám keskin ótken jarıs juwmaǵında, ul balalar hám qızlar arasında da respublikamız komandası birinshi orındı jeńip alıwǵa miyasar boldı.
Atap aytqanda, ul balalar arasında respublikamız abırayın múnásip qorǵaǵan Shımbay rayonındaǵı 43-sanlı, qızlar arasında Nókis qalasındaǵı 24-sanlı ulıwma orta bilim beriw mektebiniń oqıwshıları bas sıylıqtı jeńip alıwǵa miyasar boldı.
Sıylı ekinshi hám úshinshi orınlar Samarqand, Xorezm hám Surxandárya wálayatınıń jas gandbolshılarına nesip etti.
Ótkerilgen jarıs sońında jeńimpazlar shólkemlestiriwshiler tárepinen múnásip túrde sıylıqlandı.

Adilbay Orazov,
Qaraqalpaqstan xabar agentligi sholıwshısı