NMPI akademiyalıq liceyinde pitkeriwshilerge “Pitkeriwshilerdi joqarǵı oqıw orınlarına maqsetli baǵdarlaw hám saltanatlı diplom” tapsırıw keshesi bolıp ótti. Kesheni akademiyalıq licey direktorı Q.Qalxorazov ashıp berdi hám Prezidentimizdiń elimizdiń bilimlendiriw mákemelerin pitkeriwshi jaslarǵa jollaǵan qutlıqlawın oqıp esittirdi.

Ilajda Ájiniyaz atındaǵı NMPI oqıw isleri boyınsha prorektorı M.Ibragimov, NMPI oqıw metodikalıq bólim baslıǵınıń orınbasarı T.Tadjiev, QMU professorı T.Masharipova, QMU docenti B.Dilanov, “Shuhrat” medalı iyesi P.Kamalova, ustazlar, oqıwshı jaslar hám ata-analar qatnastı.
Bayram keshesinde sózge shıqqanlar usınday jaslarımız mámleketimizdiń jarqın keleshegi ushın xızmet etetuǵın qánigeler bolıp jetisiwine isenim bildirip, olardıń aldaǵı úlken maqsetlerine erisiwinde tabıslar tiledi. Soń akademiyalıq liceydi joqarı nátiyjeler menen pitkerip atırǵan oqıwshılarǵa diplomlar saltanatlı túrde tapsırıldı.
Maǵlıwmat ornında atap ótiw kerek, bıyılǵı oqıw jılında akademiyalıq liceydi ulıwma 279 oqıwshı pitkerip atırǵan bolsa, sonnan bir oqıwshı altın, úsh oqıwshı gúmis medal, al 18 oqıwshı ayrıqsha diplom menen pitkermekte. Olardan ulıwma 306 oqıwshı milliy hám xalıqaralıq sertifikatlarǵa iye. Oqıwshılar arasında múddetinen aldın dúnyanıń hám respublikamızdıń abıroylı joqarı oqıw orınlarına qabıllanǵan, sonıń menen birge, respublikalıq hám xalıqaralıq pán olimpiadaları, sport hám intellektuallıq jarıslar, stipendiyalar tańlawlarınıń jeńimpazları, oqıwda hám jámiyetlik jumıslarda ayrıqsha belsendilik kórsetip atırǵan jaslar kópshilikti quraydı.
Bayram ilajı koncert baǵdarlamsı menen dawam etti.

Qaraqalpaqstan xabar agentligi